Буген мәктәптә - Балаларны яклау  көне. Мәктәптәге  укучылар ике командага бүленеп көч сынаштылар. Уен төрләре балалар өчен бик мавыктыргыч һәм күңелле булды.Каршылыклар полосасы аша узу, велосипедта йөрү осталыгын сынау, ориентлашу, палатка җыю һәм башка ярышлар укучылар күңелендә зур кызыксыну уяту.Физик тәрбия укытучысы  Мостафин Р. Р. га бу ярышларны оештыруда зур активлык күрсәткән өчен зур рәхмәтебезне белдерәбез.

Отчёт концертында безнең мәктәпнең 6 чыгарылыш укучысына сәнгать мәктәбен тәмамлау турында таныклыклар тапшырылды. Аларны зур уңышлары белән котлыйбыз!

Бүген сезнең тормышта  – күңелле дә, моңсу да көн. Һәм ул башка бер тапкыр да тәмамланмаячак. Канат яргач, кошлар да оясыннан очып китә. Бүген сез дә шул кошлар хәлендә. 9 ел укып, шактый белем-тәҗрибә тупласагыз да, әти-әниләрегез һәм укытучылар сезнең өчен ут йота. Канатлары  ныкмы икән, ялгыз очканда канатлары талмас микән дип борчыла. Шул ук вакытта бу сезнең иң гүзәл чорыгыз да. Сезнең алда якты киләчәк, өметләр, төсле хыяллар.

Инде алдагы тормышыгызда юлдаш булырлык һөнәр сайлагансыздыр. Үзегез теләгән белгечлеккә укырга язсын сезгә! Кем генә булсагыз да, кайда гына эшләсәгез дә, сезне тәрбияләүгә бар көчен куйган әти-әниләрегезне, белем биргән укытучыларны, балачактан җитәкләшеп үскән сыйныфташларыгызны онытмагыз.

Тормыш юлы бик катлаулы һәм тайгак. Шул юлны абынмыйча, сөртенмичә узу бары үзегездән тора. Сез инде хәзер зурлар. Һәр адымыгызны үлчәп атлап, максатларыгызга юл ярыгыз, теләкләрегезгә ирешегез!

Ак юл сиңа, чыгарылыш сыйныф укучысы!

Бүген бөек Җиңү көне –

Моңсу, сагышлы бәйрәм.

Батырларны искә алып

Гөл куйыйк бәйләм-бәйләм!

         Бүген Хәсәншәех авылы Җиңү паркында җиңүнең 73 еллыгына багышланган митинг булды.Тантанада сугыш һәм тыл ветераннары, авыл өлкәннәре, мәктәп укучылары, балалар бакчасына йөрүче нәниләр катнашты. Авыл халкын бәйрәм котларга Арча районы мәдәният бүлеге җитәкчесе Мөхетдинов Р. Р., авыл җирлеге башлыгы Садыйков Р. Ш. килгән иде. Авыл имамы Шамил хәзрәтнең хәерле догалары белән башланган кичә һәркемнең күңеленә рухи байлык өстәгәндер дип ышанып калабыз. 

  Җиңүнең 73 еллыгын бәйрәм итү тантанасында 4 класс укучыларын варислар сафына кабул иттек. Укучылар варислар кагыйдәләрен төгәл үтәргә вәгъдә бирделәр.

  " Брестская крепость" фильмы буенча викторина узды. Укучылар караган фильм буенча кызыклы фактларны искә төшерделәр. Җиңүчеләр билгеләнде.

27 апрель көнне Казан шәһәрендә каһарман язучы А.Алишның 110 -еллык юбилеена багышланган төбәкара фәнни-эзләнү конференциясендә безнең мәктәпнең 6 сыйныф укучысы Зәкиева З. дә катнашты.”Шигърият бакчасында”секциясендә уңышлы чыгыш ясап, лауреат дипломы алып кайтты.Шулай ук аның шигырьләре җыентыкка кертелде. Зилияне һәм аның җитәкчесе Гозәерова Л.Г. ны зур уңышлары белән котлыйбыз.

Тарих атналыгы кысаларында бүген мәктәптә Җиңү көненә багышланган җырлар, шигырьләр конкурсы булды. Кичәнең максаты:  Бөек Ватан сугышы елларында халкыбызның фронтта һәм тылда күрсәткән тиңдәшсез батырлыгы үрнәкләре белән яшь буынны таныштыру; буыннар арасындагы бәйләнешне ныгыту, укучылар күңелендәге сугыш чорын, намуслы хезмәт белән көн күргән сугыш һәм тыл ветераннарына, апаларга ,әбиләргә, тыл ветераннарына олы хөрмәт хисе тәрбияләү, гадел, тату, эшчән, игелекле булырга омтылыш уяту .

 Авыл табигатен яшелләндерү, тагын да матурайту өчен ел саен зур эш башкарыла. Быел да агач утырту акциясендә катнашып, үзенчәлекле карагай агачлары утырттык. Рәхәтләнеп  үсегез, агачлар.