Мәктәбебездә “Чишмәкәй”  акциясе ел да уздырыла.Чишмәләрне чистарту,саклап тоту-безнең изге бурычыбыз.

Челтер-челтер чишмә ага,

Көмеш төсле сулары.

Су өстендә җем-җем итә

Көннең алтын нурлары.

Безнең чишмә борыла-борыла,

Зур инешкә коела.

Идел суы шундый бик күп

Чишмәләрдән җыела.

Тау астында чишмшбез,-

Су алырга төшәбез.

Татлы суын без аның

Бик яратып эчәбез.

          Агач – табигатьнең бик матур һәм файдалы хәзинәсе. Кеше ел саен бер генә агач утыртса да, күпме файда китерүен аңлый микән? Юкка гына халык: «Бер агачтан унау үскән, ун агачтан урман үскән»,- димәгән бит.

  Безнең мәктәптә  дә агач утыртуга зур игътибар бирелә. Һәрбер класс бу эшкә бик теләп катнашты. Туган авылыбызны яшелләндерүгә, матурлауга  зур өлеш керттек.

2010нчы елның 1нче сентябреннән бирле Россиякүләм балалар "Ышаныч" телефоны эшләп килә. Халыкара балалар ышаныч телефоны көнен билгеләп үтүгә Россиядә 2009нчы елда кушылдылар. Бу бәйрәм 17нче май көнне билгеләп үтелә. Ышаныч телефоны буенча бала аноним рәвештә квалификацияләнгән психологик ярдәм алырга мөмкин. Шулай ук бу номер буенча гаиләдә һәм аннан тыш физик көч куллану очраклары буенча да ярдәм сорарга була. Россия күләм ышаныч телефоны 8-800-2000-122 (гади телефоннан да, кесә телефоныннан да шалтырату бушлай).

Арча муниципаль районы буенча ышаныч телефоны: 3-02-05;

Район "Мәгариф идарәсе" ышаныч телефоны: 3-24-98.

   Бүген   мәктәбебездә  Бердәм Универсиада көне үтте.

    Универсиада көне тантаналы төстә ачылды .Мөхтәрәм кунакларыбыз ТР  Мәгариф һәм фән министрлыгыннан Матвеева Светлана Ефимовна, Мәгариф идарәсе җитәкчесе Бәдриева Рина Ринад кызы бәйрәм белән котладылар.   Универсиада көне кысаларында  һәр сыйныфта, әти- әниләр катнашында , Универсиада дәресләре, класс  сәгатьләре, спорт ярышлары  аерым план нигезендә үткәрелде. Мәктәбебезнең волонтерлары чыгышы көчле алкышларга күмелде.Күңелле стартлар,кече Сабантуй  һәркем күңеленә хуш килде,берәү дә читтә калмады, ахырдан җиңүчеләр бүләкләнде.  Универсиада көне чын бәйрәмгә әйләнде, көн  дә  искиткеч  матур , кояшлы булды.Хәзер инде зарыгып  башкалабызда узачак Универсиаданы көтәбез.

Ашытбаш урта, Кысна ,Наратлык, Акчишмә башлангыч мәктәпләрендә 1 нче класс укучыларының гаризаларын  кабул итү чоры  дәвам итә.  Мәктәпләр 25 укучыны кабул итәргә әзер. Гаризаларны язу өчен "Подача заявления на прием" бүлегенә керегез.

Тапкырларны, моңлыларны

Ярминкәдә карагыз.

Җаның нәрсә теләсә дә

Бөтен барны сайлагыз.

            Ярминкә, ярминкә

 Ярминкә сезне көтә.           

  Ярминкәдә, ярминкәдә

              Күңел ачылып китә.

Күпме халыкны җыйдык,

Мәктәпкә - ярминкәгә.

Уйнап, көлеп,җырлап, биеп,

Чын – чынлап ял итәргә.

          Сатып түгел , буш бирәбез

Яхшы товар тиз үтә.

          Җырлый тальян,сайрый тальян

          Ярминкә дәвам итә.

   11 май көнне елдагыча мәктәп ярминкәсе гөрләде.Бу инде авылдашларыбызның гына түгел,якын-тирә авылларның да көтеп ала торган матур бер бәйрәменә әйләнде.

Җиңү көне белән!

Хөрмәтле сайтыбыз кунаклары!

   Г.Тукай исемендәге Ашытбаш  урта гомуми белем бирү мәктәбе коллективы сезне Җиңү көне белән тәбрикли.

     Бөек Ватан сугышы ветераннарына, тыл хезмәткәрләренә һәм аларның якыннарына исәнлек, бәхет, аяз күк йөзе, иминлек теләп кала.

   Бөек Җиңүнең 68 еллыгы авылыбызда зурлап билгеләп үтелде.Обелиск янында уздырылган митингка сугыш һәм тыл ветераннары чакырылды. Мәктәп укучылары Җиңү көненә багышланган монтаж куйдылар. Сугыш кырларында һәлак булган авылдашларыбыз истәлегенә веноклар салынды.

Җиңү көне иң зур бәйрәм бит ул,

Дүрт күз белән зарыгып көткән көн.

Күпме кайгы, югалтулар аша

Илгә шатлык алып килгән көн.

Җиңү көне җиргә килгән саен,

Яфрак ярган саен бөреләр

Яу кырында калган ир-егетләр

Күңелләрдә кабат терелә.

Ап-ак чәчле әнкәй, җиңгиләр бит

Һаман көтә ирен, улларын.

Гомер буе әрни йөрәкләрдә

Яралары утлы елларның.

Бүген бәйрәм. Күздән яшь тамса да

Без бәхетле — аяз күгебез.

Саклап калсак иминлекне җирдә

Аяз булыр килер көнебез.

7 нче май көнне район күләмендә татар теле укытучыларының иҗади бәйгесе үтте. Ашитбаш урта мәктәбеннән татар теле һәм әдәбияты укытучысы Аухадиева Миләүшә Рәшит кызы  уңышлы чыгыш ясады. Без аны чын күңелдән котлыйбыз!

  Бөек шагыйрь Габдулла Тукайның тууына 127 ел тулу уңаеннан Татарстан Республикасы  "Илһам чишмәсе" исемле III республика әдәби-иҗат бәйгесе уздырды. Аны Татарстан Республикасы Мәгариф һәм фән министрлыгы, "Мәгърифәт" газетасы, Казан шәһәренең Совет районы мәгариф бүлеге, 20 нче гимназия, Совет район укытучыларының "Илһам чишмәсе" әдәби-иҗат берләшмәсе оештырды. Җиңүчеләрнең  иҗади эшләре “Илһам чишмәсе” исемле җыентыкка кертелде. Котлау тантанасы 6 май көнне Казанда  уздырылды. Финалга чыккан  укучылар  Татарстан Республикасы  мәгариф һәм фән министрлыгының дипломнары белән бүләкләнде. Безнең мәктәптән дә әлеге бәйгедә җиңүчеләр бар,менә алар:

-Абдуллина Алисә,11 нче сыйныф  укучысы;

-Кавиева Нәркизә ,9 нчы сыйныф  укучысы;

-Мөхәммәтдинова Чулпан,8 нче сыйныф укучысы

26 нчы апрель-Габдулла Тукайның туган көне. Бөек шагыйребезнең туган көнен без зурлап искә алдык. Төрле чаралар, конкурслар, әдәби кичәләр белән кайнады мәктәп. Укучылар үзләре дә, Тукайга ияреп, каләм тибрәтеп карадылар,иҗат җимешләре белән таныштырдылар.

   Габдулла Тукай безгә бик зур, кыйммәтле мирас калдырган.Ә без шул хәзинәне сакларга,буыннан-буынга дәвам итәргә тиеш.