Бүген мәктәбебездә гомуми ата-аналар җыелышы уздырылды. Иң элек классларда фикер алышканнан соң, барлык укучылар һәм ата-аналар тантаналы линейкага җыелдылар. Мәктәп директоры А.С.Хазиев уку елы дәвамында уку алдынгылар булып танылган укучыларны, сәбәпсез дәрес калдырмаучы укучыларны, спорт-сәнгатьтә актив укучыларны, мәктәп бакчасында тырышып эшләүче укучыларны, мәктәп белән тыгыз элемтәдә торып үзара хезмәттәшлек иткән гаиләләрне  котлап,   иганәчеләр ярдәме белән алынган бүләкләрне тапшырды. Башлангыч класс укучыларын җәйге каникулга озатуны, 5-9 класс укучылары өчен алда мәктәптә лагерь оештырылуын, күңелле яллар көтүен хәбәр итте.

     Мәктәбебезнең чыгарылыш сыйныф укучылары авыл хуҗалыгы хезмәте һәм тегү хезмәте дәресләреннән имтихан тапшыралар. Бүген авыл хуҗалыгы хезмәте буенча  тәүге имтиханны барлык укучылар да уңышлы тапшырды. Укучыларыбызга алдагы имтиханнарны да ныклы әзерлек белән уңышлы тапшыруларын телибез.

    Бүген чыгарылыш класс укучылары өчен соңгы кыңгырау яңгырады. Әлеге истәлекле матур бәйрәмдә район пенсия фонды идарәсе җитәкчесе Д.Г.Әмирҗанов, Такталачык авыл җирлеге башлыгы К.М.Шәйхразиев, Такталачык урта мәктәбе директоры А.Ш.Рахманов , 9 класс укучыларының ата-аналары катнашып, укучыларга үзләренең изге теләкләрен җиткерделәр. Д.Г.Әмирҗанов мәктәп коллективына истәлек бүләге тапшырды.

     Мәктәп яшелчә бакчасында күмәк тырышлык белән бәрәңге утырту оештырылды. Дәрестән тыш вакытларда һәм хезмәт дәресләрендә башка төр яшелчәләр дә утыртылды. . Язгы тырыш хезмәтнең җимеше мул булсын иде, ди укучылар.

     Бүген авыл мәдәният йорты каршында Бөек Җиңүнең 69 еллыгына багышланган митинг булды. Әлеге чарада  Такталачык урта мәктәбе  һәм мәктәбебез укучылары мәдәният йорты хезмәткәрләре белән берлектә Бөек Ватан сугышына озату,  тылдагы хезмәт һәм яудан каршылау  күренешләрен  авыл халкына сәхнәләштереп күрсәттеләр, һәйкәлгә венок салдылар.

      Мәктәбебез укучылары авыл хуҗалыгы хезмәте дәресләрендә һәм дәрестән тыш вакытларда язгы бакча эшләрендә актив катнашалар: мәктәп яны тәҗрибә участогын һәм яшелчә, җиләк җимеш бакчаларын чистарталар, җимеш агачларын агарталар, яшелчәләр утыртыр өчен түтәлләр әзерлиләр.

   21 нче апрельдән 27 нче апрельгә кадәр мәктәбебездә Туган тел атналыгы узды. Быел ул Г.Тукай иҗатын өйрәнүгә багышланды.Бу уңайдан стенгазета чыгарылды. Анда Г.Тукайның тормыш юлы һәм иҗаты яктыртылды. Укучылар Г.Тукай иҗаты буенча сорауларга җаваплар эзләделәр. Ә 26 апрель көнне Г.Тукайга 128 ел тулу уңаеннан бәйрәм иртәсе узды.Укучылар Тукай әсәрләрен сәхнәләштереп күрсәттеләр, шигырьләрен яттан сөйләделәр. Бәйрәм Тукай сүзләренә язылган җырлар белән үрелеп барып, күтәренке рухта, күңелле үтте. Әлеге чараларны татар теле укытучысы З.М.Гибадуллина әзерләп үткәрде.

    Түбән Кама шәһәрендә уздырылган столяр хезмәте һәм тегү хезмәте буенча "Лучший по професии-2014" конкурсында мәктәбебез укучылары И.Газизов һәм В.Галиева (җитәкчеләре Р.Ш.Шаймарданов, Г.З.Мусина) уңышлы чыгыш ясадылар. Укучыларыбызны һәм укытучыларны әлеге уңышлары белән котлыйбыз, дәресләрдә алган белемнәрне тормышта уңышлы куллана белүләрен телибез.

     Бүген мәктәбебездә Россия Махсус Олимпиадасының армрестлинг буенча зона ярышлары  үтте. Мәктәбебез командасы әлеге ярышта бу уку елында да сынатмыйча I урынны яулады. Әлеге җиңүләре белән укучыларыбызны һәм тренерлары А.С.Хазиевны, Н.А.Сибгатуллинны ихлас күңелдән котлыйбыз һәм республика этабы ярышларында да җиңү яулауларын телибез.