Бүген мәктәптә балаларны татар халкының милли бәйрәме "Каз өмәсе" йоласы белән таныштыру, халкыбызның күркәм гореф-гадәтләре, матур йолалары белән таныштыру максатыннан "Каз өмәсе-авыл бизәге" дигән бәйрәм уздырылды. Балалар татар халык уеннарын бик яратып уйнадылар, табышмаклар, мәкальләр әйттеләр. Авыл халкы элек-электән күп көч сорый торган эшләрне ирекле рәвештә җыелышып, күмәкләшеп башкарган. Күп каз асраган гаиләләрдә каз өмәсен оештыруны тормыш үзе таләп иткән. Өмәдә барыннан да элек кызларның уңганлыгы сыналган. Булачак кайнаналар үзләренә ошаган кызларны шунда билгеләп куйганнар. Борынгы әби-бабаларыбыз казларны бик яратканнар. Күргәнебезчә, каз өмәсе авыл тормышының бер бизәге. Бу гадәтебез яшь буынга кире әйләнеп кайтыр дип ышанасы килә.