Бүген "Йолдызлык" конкурсының район этабына нәтиҗәләр чыгарылды. Безнең балалар бакчасы район бакчалары арасында җиңү яулады. Балаларыбызны, тәрбиячеләрне  җиңүләре белән чын күңелдән котлыйбыз! Киләчәктә тагы да югарырак үрләр яуларга язсын!

Бөтенрәсәй күләм үткәрелүче "Россия чаңгы юллары - 2017" чарасында безнең бакча коллективы да актив катнашты.

Бүген бакчабызда "Йолдызлык - 2017" бәйгесенең район этабына сайлап алу туры үтте. Балаларыбызның җырлары, биюләре һәм оста итеп сөйләүләре жюри тарафыннан югары бәяләнде. Нәни йодызчыкларыбызга алдагы чыгышларында да уңышлар телибез.

Бүген "Ел тәрбиячесе - 2017" конкурсының район туры үтте. Бакчабызның беренче категорияле тәрбиячесе Салахова Эльвира Бәһрәм кызы уңышлы гына чыгыш ясап,  "Эзләнүчән тәрбияче" номинациясендә җиңү яулады.

Бакчабызда Татарстан Республикасының беренче президенты Минтимер Шәриповичны хөрмәтләп зур вакыйга узды. Балалар үз куллары белән аның яраткан ризыгы - тары кыстыбые пешерделәр. Башта пешекче апаларның эчтәлекле итеп татар халкының милли ризыклары турында сөйләгәнен тыңладылар. Шуннан соң гына тары кыстыбые пешерү серләренә төшенделәр. Кечкенә бармаклары белән камыр җәеп карау, киптерү, эчлеген салып кысу, кыстыбыйны майлау мизгелләрендә балалар үзләрен бик җитди тоттылар. Аларда үз хезмәтләренең нәтиҗәсен күреп. горурлану хисе уянды. Пешекчеләр белән саубуллашканда балаларның күзләрендә уйнаган шатлык нуры шул турыда сөйли иде.

Бүген бакчабызда "Ел тәрбиячесе -2017" конкурсы булып үтте. Тәрбиячеләребез белем бирү эшчәнлекләре күрсәттеләр, методик темаларын ачып презентация якладылар. Беренче урынны Салахова Эльвира Бәһрәм кызы яулады. Аңа конкурсның алдагы этапларында да уңышлар насыйп булсын!!!

Көзге муллык, көзге байлык!

Бакчада - каз өмәсе!

Яше-карты, бала-чага - 

Шау-гөр килә һәммәсе!

Каз - кешеләр тарафыннан кулга ияләштерелгән иң борынгы кошларның берсе. Әби-бабайларыбыз бу кошны бик теләп асраганнар, мамыгыннан мендәр, түшәк, ястыклар ясаганнар. Беренче кар төшеп, көннәр суытуга гөрләтеп каз өмәләре үткәргәннәр. Каз өмәсе ул эш кенә түгел, матур итеп аралашу, күңел ачу чарасы да булган.

Бакчабыз балалары мондый йола-бәйрәмнәр белән даими танышып торалар, бик теләп катнашалар. 

Районда "Бию мәйдан" биючеләр фестиваль-конкурсы гөрли. Бу чарадан бакчабыз балалары да читтә калмады - сәхнәләрне дер селкетеп уңышлы чыгыш ясадылар.

26нчы ноябрь көнне Казан шәһәренең 10нчы гимназия базасында "Бүгенге көн педагогика фәненең актуаль проблемары" дип аталган IV халыкара фәнни конференция булып үтте. Казан федераль университеты һәм Казахстан республикасы Милли мәгариф акдемиясе оештырган бу гамәли чарада бакчабыз тәрбиячеләре Хисматуллина Лилия Фәрит кызы, Шарапова Фәрсия Фәһим кызы, Марданова Айгөл Дамир кызы, Мазнавиева Миләүшә Роберт кызы катнашып уңышлы чыгыш ясадылар. Республикабыз районнарында ФДББС кысаларында балалар бакчасында тәрбия һәм белем бирүнең торышы турында түгәрәк өстәл артында фикер алыштылар. Африка илләрендә, Казахстанда белем бирү системасы белән танышып, бай мәгълумат туплап кайттылар.

Әниләр көне уңаеннан атна буе бакчабызда күңелле бәйрәм чаралары оештырылды. Балалар әниләрне котлап бәйрәм иртәләре әзерләде - җырлар өйрәнделәр, шигырьләр ятладылар. Аларның чыгышларын әниләр бик җылы кабул иттеләр. Ә әниләрне иң сөендергәне - балаларның үз куллары белән ясаган истәлек бүләкләре булгандыр, мөгаен.