Мәктәп яны тәҗрибә участогында бакча эшләре башланып китте. Суган,кишер,кызыл чөгендер яшелчәләре чәчелде. 

    Бүген, ягъни 26 нчы апрель, 4 нче сыйныфта Габдулла Тукайның туган көненә багышланган сыйныф сәгате үтте. Балалар  Г. Тукай шигырьләрен яттан сөйләделәр,викторина сорауларына җавап бирделәр. Сыйныф сәгате Туган тел җыры белән тәмамланды.

                  Сыйныф җитәкчесе: Хасанова А.М.

Бөек шагыйребез Г.Тукай туган көннәрендә мәктәптә татар теле атналыгы зур оешканлылык белән үтте.Бүген 6  сыйныф укучылары Ренат Харисның "Серле алан" пьесасын сәхнәләштерде. Укучылар чын артистларча уйнап тамашачыларны бик сөендерделәр.

Таһиров Р.Ә.

Ходайның һәр бирмеш көнендә

Бер матур як белән ачылыйк.

Кешенең гомере бер генә,

Яхшылык эшләргә ашыгыйк!

                       Ф.Яруллин

   Бүген ,21 нче апрель, 1 сыйныфта  “Яхшылык эшләргә ашык!” исеме астында тәрбия сәгате уздырылды.

   Укучыларда бер-берсенә һәм әйләнә-тирәдәгеләргә карата игътибарлылык, мәрхәмәтлелек хисләре тәтбияләү;укучыларның үз-үзләренә әлеге хис-тойгыларның тәрбияләнүенә юнәлеш бирү максат итеп куелган иде.

    Тәрбия эше уен-сәяхәт формасында оештырылды. Укучылар “Шәфкатьлелек”, “Экология”, “Дуслык” , “Белем “ планеталарына сәяхәт иттеләр.

   Сәяхәт “Тылсымлы сандык” уены белән төгәлләнде. Тылсымлы сандыкта көзге урнаштырылган иде. Көзгедән һәрбер бала үзенең чагылышын күрде.

Кеше булып калыйм дисәң,

 Бул син кешелекле.

   Бәхетле көн итим дисәң,

      Бул син игелекле.

                         Г. Гайнетдинова

     Сыйныф җитәкчесе Нуруллина Р.И.

     "Рус теле көне" көненә багышланган район бәйгесендә 2 б сыйныф кызлары 1 урынны яулады. Әфәрин!

                                 Сыйныф җитәкчесе: Кадыйрова Г.Р.

    21 нче апрель 1 нче сыйныф укучылары,  аларның әти-әниләре һәм сыйныф җитәкчесе “Исәннәрнең кадерен бел !” исеме астында изгелек көне оештырдык. Авылыбызның хөрмәтле кешесе, Бөек Ватан сугышы ветераны Ситдикова Зәйнәп әбинең хәлен белергә бардык.

     Әбигә 96 яшь булса да хәтере яхшы, ораторлык сәләте көчле, күзләре яхшы күрә. Без килгәндә күзлексез “Авыл таңнары” газетасын укып утыра иде.

     Ветераныбыз безне сөенеп каршылады, үтенечебезне канәгатьләндереп, сугыш чорында күргән-белгәннәрен, балаларга аңлаешлы телдә, сөйләп бирде. Без үз чиратыбызда аңа исәнлек-саулык теләдек, якынлашып килүче Җиңү бәйрәме белән котлап ,бүләкләребезне тапшырдык. Истәлеккә сурәткә төшеп, өйләргә кузгалдык.

      Бу гамәлебез балаларга патриотик тәрбия бирүнең иң үтемле алымы булды, дип уйлыйм.

                          Сыйныф җитәкчесе: Нуруллина Руфия

        2017ел  Россиядә экология елы дип игълан ителде. Шул уңайдан мәктәбебез укучылары  Ломоносов исемендәге Мәскәү дәүләт университеты үткәргән Бөтенроссия экологик диктантта катнашты. 

                                                 Биология укытучысы Залалтдинова Ф.М.

        20 апрель көнне  “Мәрхәмәтле Татарстан” акциясе уңаеннан мәктәптә  “Мы за ЗОЖ”” дигән исем астында  күңелле эстафеталар  булып узды.    Уеннарны  физкультура  укытучысы Сайфуллин Ж.М. оештырды. 

    19 апрель көнне  “Мәрхәмәтле Татарстан” акциясе уңаеннан мәктәптә  “Игелекле эшләр” дип исемләнгән рәсем конкурсы булып узды. Конкурста 5- 7 сыйныф укучылары катнашты.Конкурсны   сәнгать укытучысы Минигулова Л.М. оештырды. 

      18 апрель көнне 7 нче сыйныфларда “Мәрхәмәтле Татарстан” атналыгы кысаларында  “Минем өлкәннәргә һәм ветераннарга кылган игелекле эшләрем” дигән темага иншалар бәйгесе үткәрелде. Укучылар үзләренең әби-бабаларына, инвалид авылдашларына һәм сугыш ветераннарына кылган мәрхәмәтле эш-гамәлләре турындагы иншаларын иптәшләре алдында укыдылар.