29-30 октябрьдә Удмуртия  Республикасының  Ижау  шәһәрендә Татарстан  һәм Удмуртия Республикаларының  Мәгариф һәм фән  министрлыгы  белән берлектә оештырылган   Татар мәгърифәте  көннәре узды. Әлеге чарада Зәй районыннан  да делегация катнашты: Татар гимназиясе  директоры  Л.С.Әхмәтҗанов, укыту эшләре буенча директор урынбасары  З.Г.Нәбиуллина, шулай  ук  2, 6, 7 нче мәктәпләрнең милли мәсьәләләр буенча  директор урынбасарлары  А.С. Абдуллина, Л.Ю. Камалиева, М.К. Вәлиәхметова. 

         Пленар  утырыш Халыклар дуслыгы йортында узды. Утырышта Татарстан  Республикасының  Мәгариф һәм фән  министры  Фаттахов Э.Н. һәм Удмуртия Республикаларының  Мәгариф һәм фән  министры Мирошниченко А.А., Удмуртия  Республикасының  мәгариф бүлеге  башлыгы  Пластинина Л.В., Әгерҗе муниципаль районы мәгариф бүлеге башлыгы Сафиуллина В.Г.ның  чыгышлары  тыңланды.

       Пленар утырыш  тәмамланганнан  соң  Татарстан һәм Удмуртия  Республикаларының  Мәгариф һәм фән  министрлыклары  арасында  эшчәнлекне дәвам итү  турында килешүгә кул куелды. Шундый ук   килешү  Зәй районының  Татар гимназиясе  һәм  Ижау шәһәренең  12 нче мәктәбе белән төзелде.