Һәр кешенең туган көннән башлап, туплаган хәзинәсе – ул тел. Һәр милләт кешесе өчен иң матур, иң кадерле тел – үзенең туган теле. Билгеле булганча, безнең татар телебез ЮНЕСКО тарафыннан бөтен дөнья халыкара аралашу теле дип саналган 14 телнең берсе. Татар телендә аралашабыз икән, димәк, татар милләте яши, үсә. Халкыбызның югалмавы, телебезнең үсүе безнең кулда. Милләтебезнең дәвамчылары буларак, укучыларга, балаларга бу хәзинәне түкми-чәчми җиткерү – безнең бурыч.

20 нче февраль көнне Татар гимназиясендә Халыкара туган тел көненә багышланган зур чара үтте. Бу чарада чыгыш ясаучы укучыларыбыз ана телебезгә булган мөнәсәбәтләрен, олы ихтирам хисләрен җыр–биюләр, шигырьләр аша белдерделәр. Туган телне ничек яратуларын дәлилләделәр.

Шушы чара белән без республикабызда уздырыла торган “Мин татарча сөйләшәм” акциясендә катнашуыбызны башлап җибәрәбез.