Кечкенә бала һәркөнне тормышына  янаган куркыныч күренешләр белән очраша. Мондый очракларда бала тиешле чишелеш таба алмыйча югалып калырга мөмкин. Көндәлек тормыш хәвефсезлекләре табигый һәм бала аларның күпчелеге белән очрашып, дөньяны танып белергә өйрәнә. Дөньяда, бер генә тапкыр булса да, егылып яисә пешеп карамаган бала бик сирәктер ул.
Бүгенге көндә җәмгыять алдында яңа проблемалар килеп туды. Алар бөтенебезгә янаса да, балалар иң яклаучысыз, тәҗрибәсез социаль төркемгә керү сәбәпле, чит кешеләр, корбаны булырга мөмкиннәр. Шуңа күрә, без педагоглар,  чит кешеләрдән саклану, “терроризм” төшенчәсенең эчтәлеген аңлату, чит әйберләргә тотынмау, компьютер технологияләре тудырган куркынычлар, янгыннан саклану чараларын балаларга аңлатырга тиешбез. Куркынычсызлык кагыйдәләрен искә төшерү максатыннан, бүген " Кояшкай" балалар бакчасында тәрбияланүче мәктәпкә әзерлек төркеме балалары "Энергетик" мәдәният сараенда, "Куркынычсызлык әлифбасы" дип аталган чарада катнаштылар.
Чара барышында балалар урамда, юлда, урманда һәм суда үзеңне саклау кагыйдәләренә төшенделәр.
 Балалар уен формасында юл билгеләре турында белемнәрен ныгыттылар, светофор сигналларын белү уеннарында катнаштылар. Шулай ук, табышмаклар чиштеләр, төрле ситуацияләргә җавап эзләделәр. "Бу мин, бу мин ,болар барысы да минем дусларым”дигән уенда катнаштылар. Барлык балалар да бик теләп уйнадылар, сорауларга җавап бирделәр.Бик канәгать калдылар.