11 нче апрель көнне 1нче лицейдә “Туган телем – иркә гөлем, киңдер сиңа күңел түрем” дигән тема астында Яшел Үзән муниципаль районы мәктәпләренең ата - аналар конференциясе булып узды. Конференциянең максаты мәктәпләрдә укучыларның ана теленнән белем бирүнең сыйфатын һәм нәтиҗәлелеген күтәрү, эчтәлеген яхшырту, укытуны заман таләпләре югарылыгына кую, балаларны туган телгә өйрәтү – ата-аналарның гражданлык бурычы икәнлеген аңлату иде. Конференциядә шәһәребезнең төрле мәктәпләреннән килгән ата-аналар, укытучылар, мөхтәрәм кунакларыбыз шәһәребезнең милли-мәдәни үзәк җитәкчесе, “Тукай” фонды директоры Клара Мәрдән кызы Филиппова, мәгълүмати – методик үзәк директоры Роза Әбрар кызы Сәлахова,  Яшел Үзән шәһәре имам – мөхтәсибе Габделхәмит хәзрәт Зиннәтуллин, “Тынычлык” мәчетенең имам хатыйбы Сәфәрханов Габделхәким һәм башка мөхтәрәм кунакларыбыз катнашты. Туган телне өйрәтүне көчәйтү һәм белем бирүнең эчтәлеген яңарту максатында татар телен дәүләт теле буларак укытуның торышы, тел өйрәнүнең нәтиҗәле алымнары, уңышлары, проблемалары уртага салып сөйләшенде, төрле тәкъдимнәр, киңәшләр тыңланылды. Мәгълүмати – методик үзәк директоры Роза Әбрар кызы Сәлахова әти-әниләрнең күпсанлы сорауларына җавап бирде. Очрашу нәтиҗәле һәм файдалы узды.

Фоторепортаж