Тиздән җылылык һәм ихласлык белән тулы бәйрәм - Әниләр көне җитә.Күңелне нечкәртүче әлеге тантана алдыннан мәктәбебез китапханәсендә китап күргәзмәсе оештырылды. Анда әдипләрнең газиз әниләргә багышланган шигырьләре, хикәяләре кертелгән китаплар, газета-журнал материаллары урын алды. Күргәзмә белән барлык сыйныф укучылары да танышты. Мәктәбебез китапханәчесе Лилия Илсуровна Әниләр көненең тарихы турында
сөйләде. Аннан соң татар теле укытучысы Рамилә Әхәтовна Ана образы халык авыз иҗатында да, матур әдәбиятта да, публицистикада да төп урынны алып торуы турында искәртте. Йөзләгән мәкаль һәм әйтемнәр, “Өч кыз” әкияте, әниләр, аналар, әнкәйләр турында шигырь, поэмалар, проза әсәрләре, драмалар, алар буенча куелган спектакльләр... Соңыннан рус теле укытучысы Эльмира Азатовна укучылар игътибарына рус әдәбиятында Ана образын чагылдырган авторларның танылган әсәрләре белән таныштырды. Ананың кеше тормышында ролен рус шагыйрьләреннән көчлерәк һәм рухлырак итеп беркем дә чагылдырмый.
Әлеге китап күргәзмәсе - гүзәл әдәбият әсәрләре белән танышу гына түгел, ә әнинең тормышыбыздагы роле турында уйлану, рәхмәт һәм мәхәббәтеңне белдерү өчен сәбәп тә. Чөнки әни һәрберебез өчен иң кадерле кеше, һәм безгә ничә яшь булса да, аның назлы, ягымлы куллары, игелекле, сизгер йөрәге кирәк.