14 нче октябрь көнне мәктәбебездә КФУның Идел буе төбәкара мәгариф хезмәткәрләренең квалификациясен күтәрү һәм яңадан әзерләү үзәге оештырган курсларда республикабызның төрле районнарыннан булган 23 татар теле һәм әдәбияты укытучысы «Мәктәптә тәрбия эшенең актуаль мәсьәләләре» дигән тема буенча стажировка үтте. Укытучылар татар һәм рус төркемнәрендә  ачык дәресләр, мастер-класс һәм сыйныфтан тыш чаралар карады.  Каюм Насыйри исемендәге интерактив музей белән таныштылар.
Татар теле һәм  әдәби уку дәресләрендә шәхси, метапредмет, предмет нәтиҗәләренә ничек ирешергә? Рус телендә сөйләшүче балаларда татар телен өйрәнүгә мотивацияне нинди чаралар һәм ысуллар ярдәмендә булдырырга? ФДББС шартларында рус мохите сөргән шәһәр мәктәбе шартларында татар теле фәне буенча дәрестән тыш эшчәнлекне ничек оештырырга?  Укытучылар әлеге сорауларга җавап таба алганнардыр, дип ышанабыз.
Мәктәп директоры, педагогика фәннәре кандидаты, Россия Федерациясенең атказанган укытучысы, Россиянең иң яхшы директорларыннан берсе булып танылган Роберт Мияссар улы Мансуров, аның милли мәгариф мәсьәләләре буенча урынбасары Хәбибрахманова Минзилә Мөдәрис кызының киңәш-тәкъдимнәре, укыту-тәрбия эшчәнлегендәге һәрбер яңалыкны башкалар белән дә бик теләп уртаклашырга омтылулары, мәктәптәге эшлекле атмосфера, дустанә мөнәсәбәт курслардагы мөгаллимнәрнең күңеленә хуш килде.  Түгәрәк өстәл вакытында алар рәхмәт сүзләрен, теләкләрен җиткерделәр.