Яфрак түгел җиргә карлар ява,

Салкынлыгы өзә бәгерьне.

Ай-кояшны көткән кебек көтәм

Син бит миңа шундый кадерле.

Кыш биргән хис тузган бураннардай,

Араларда бозлы киртәләр.

Алда нинди авырлыклар тагын

Чиксез диңгез кебек көтәләр.

Сизелми дә үтте ямьле көзләр,

Шулай узар микән кышлары?

Килерсеңме умырзая тотып,

Булып язның күчмә кошлары.

Минем биттә эрегән карларның

Тамчылары инде саналган.

Мин сынмамын, ерак китсәң дә син

Рухым бураннарда сыналган.

Син бит карлы юлдан атлап түгел,

Йөрәгемне өзеп үткәнсең.

Киткәнсең дә, борылыплар карап

Килерме, дип мине көткәнсең.

Мәликә Хисамудинова