Шигырь укучылар бәйгесе: “Иң татлы тел – туган тел”

Нәрсә соң ул туган тел? Бакчабызда  “Халыкара  туган тел көне”нә багышланган “Шигырь укучылар бәйгесе” әнә шушы сорауга җавап эзләүдән башланды. Балалар шөгыльләрдә алган белемнәренә таянып,туган тел төшенчәсенең асылын аңлатырга тырышты. Алга таба кичә шигырьләр, җырлар белән үрелеп дәвам итте.  Бәйгедә егермеләп катнашучы көч сынашты.  Гыймадиева Сафира, Мостафина Исламия, Салихова Азалия  сәнгатьле, үтемле чыгышлары белән тамашачының күңелен яулады.  Цыганова Ульяна, Шәрәфиев Чыңгыз,   Шәрифуллин Булат һәм Абрарова Зәринә шигырьләрне рольләргә бүлеп, кызыклы формада тәкъдим итте. Кечкенәләр төркеме нәниләре дә  кимен куймады.   Мәктәпкә әзерлек төркеме исә Һади Такташның “Тәүфыйклы песи” әсәрен сәхнәләштергән иде.  Валиуллова Әминә, Галиуллин Камил һәм Сәгъдиева Әдилә рольләрне чын артистларча зур осталык белән башкарды.

Бүген яңгыраган әсәрләр тамашачыларга татар теленең аһәңен, сыгылмалылыгын, матурлыгын тоярга ярдәм итте.  Мондый чаралар сабыйлар өчен тәүге адымнар булса да, соңгысы булмас. Алар балалар бакчасында сеңдерелгән туган телгә мәхәббәт хисенә тугры булып, үз милләтенең горур ул-кызлары  булып үсәрләр дип өметләнәбез.