Уен мәктәпкәчә яшьтәге бала тормышында мөстәкыйль эшчәнлекне үстерүдә зур роль уйный. Үзара мөнәсәбәтләрдә ориентлашу, күзаллауны үстерү һәм аралашу өлкәсендә дә уен киң кулланыла.Уен эшчәнлеге – мәктәпкәчә яшьтәге бала үсешендә зур этәргеч. Бакчада балалар өчен уен тирәлеген булдыру – төп шарт булып тора. Безнең балалар бакчасында да сюжетлы-рольле уенга бик зул урын бирелә. Тәрбиячеләрнең белемен ныгыту, булган белемнәрен практикада куллана белүләрен арттыру максаты белән "Балалар бакчасында сюжетлы-рольле уеннар " темасына семинар-практикум булып узды.

Хәзерге вакытта баланың тормышы төрле информация – китаплар, телевидение, компьютер, башка кешеләр белән аралашу чаралары белән тулы. Ә балалар бакчасында педагогик процесс вакыты дәрес, дәрестән тыш шөгыльләргә бүленгән. Баланың буш вакытта үзе теләгән уеннар, аны кызыксындырган эшләр белән шөгыльләнергә хокукы һәм мөмкинлеге бар. Бу вакытта һәр бала үзенең индивидуаль аерымлыкларыннан чыгып, фантазиясен һәм мөмкинлекләрен эшкә җигеп иҗади шөгыльләнә ала. Бугенге семинарда нәкь менә шул иҗади вакытны ничек дөрес, кызыклы һәм файдалы итеп оештырырга кирәклеген ачыкладык.