Вакыт дигәнең сизелми дә уза да китә. Әле кайчан гына салкын кышка аяк баскан булсак, бүген инде бар җиһанны кояш нурлары иркәли. Табигать язга аяк басты. Озакламый бар дөнья җанланыр: агачлар яфракка бөреләнер, беренче чәчәкләр-умырзаялар калкып чыгарлар,җылы яктан кошлар кайтыр. Кошлар дигәннән, бүген 18 апрель көнне 4 А сыйныфы укучылары, укытучылары Ибраһимова Нурфия Фәсхетдин кызы белән берлектә өстәмә белем бирү дәресендә мәктәп бакчасына чыгып, кош оялары куйдылар. Бу дәреснең төп максаты: укучыларның кошлар турында белемнәрен тирәнәйтү,бәйләнешле сөйләм телен камилләштерү, хезмәткә мәхәббәт тәрбияләүдән гыйбарәт иде. Балалар дәрестә төрледән-төрле кош оялары ясап, җимнәр әзерләделәр. Бакчага чыгып, үз ояларын кую укучыларга аеруча ошады. Саф һавада уздырылган дәрес файдалы да, кызыклы да узды. Һәркем шат күңел, күтәренке кәеф белән кайтып китте. Кошларга, гомумән, барлык тереклеккә, җан иясенә һәрвакыт игътибарлы булсак иде.