1 нче декабрь көнне гимназиябезнең актлар залында 4-11 нче сыйныфларда укучы егетләрнең әтиләре җыелды. Әлеге җыенда алар "Балаларда эчке рухи активлык халәте булдыру һәм җәмгыятьтәге тискәре йогынтыларга каршы торучанлыкны тәрбияләү” темасына фикер алыштылар. Беренче көн тәртибе буенча доклад белән гимназиябезнең социаль педагогы Шигабиева Г.Р. чыгыш ясады. Шулай ук район башкарма комитетының балигъ булмаган балаларны яклау һәм алар белән эшләү комиссиясе җитәкчесе Сабиров Р.Х., Саба муниципаль районы эчке эшләр бүлеге начальнигы, полиция полковнигы Гильманов Р.А., балигъ булмаган балалар белән эшләү инспекторы Закиев И.Т.ларның чыгышлары тыңланды. Алар үз чыгышларында яшүсмерләр арасындагы җинаятьчелекнең торышы, балалар арасында хокук бозу очраклары турында сөйләделәр. Фикер алышуда гимназиянең ата – аналар комитеты җитәкчесе Нигматзянов Ф.А., Вакказов Расим, Залялиев Шәүкәтләр актив катнашты.
Барлык чыгышларны тыңлаганнан соң , җыелыш түбәндәге карарны чыгарды:
1. Әтиләргә бала тәрбияләүдә игътибарны ныгытырга, баланың эш-гамәлләрен, кемнәр белән аралашуын, кайларда йөрүен ныклы контрольдә тотарга.
2. Гаиләдә бала яшәешенең фәлсәфи проблемаларын чишәргә, сорауларына җавап табарга булышырга, бала шәхесенең тормышка билгеле бер мөнәсәбәтен формалаштырырга, тормыш позициясен булдырырга, мәгънәсен аңларга ярдәм итәргә;
3. Балаларны сәламәт яшәү рәвешенә күнектерергә.