Бүген мәктәбебездә 7-8 нче сыйныфлар катнашында “Исемең матур кемнәр куйган” исеме астында татар халкының гореф-гадәтләрен чагылдырган әдәби чара үткәрелде.
     Гаиләдә бала туу гаять зур шатлык булып санала. Бу уңайдан татар халкында бик матур гореф-гадәтләр формалашкан: кечкенә сабыйны кабул итү һәм бу эштә иң актив шәхес кендек әбисенә тапшыру, зур хөрмәт, ышану һәм бүләкләр; бәби туе, балага иксез-чиксез өметләр баглап бәхетләр теләп, тирән эчтәлекле исем кую, юындыру, сөннәт һ.б.
     Исем кушу гаиләдә зур вакыйга. Исем кушу, бала тугач та, бер атна-ун көн эчендә башкарыла. Исем кушу мәҗлесендә ата-ана, әби-баба, кендек әби катнашырга тиеш.
     Галимнәр уйлавынча, балага белем һәм тәрбия бирүдә бишек җырлары бик зур роль уйный. Бишек җырлары баланы кешеләргә ихтирамлы, мәрхәмәтле булырга, ата-ананы хөрмәт итәргә өйрәтә, туган теленә, милләтенә мәхәббәт тәрбияли.
     Баланың беренче көненнән үк туплый башлаган хәзинәсе – туган теле. Ана телендә үзләштерелгән белем-күнекмәләр акыл-зиһен хәтеренә көчлерәк сеңәләр.
     Шушу йолаларны искә төшереп, күңелдән үткәреп, әдәби кичәдә яңарттык, уйнап карадык. Безнең бурыч милли гореф-гадәтләребезне, йола-бәйрәмнәребезне буыннан-буынга тапшыру, киләчәгебезне кайгыту.