Мәктәбебезнең 5 нче сыйныф укучылары бик кызыклы һәм мавыктыргыч очрашуда булдылар - алар Саба районы мәдәният йортына сәяхәт кылдылар. Очрашу башында укучыларга бөек татар театр артисты, якташыбыз Шәүкәт Биктимеров турында сөйләделәр, мәдәният йортының аның исемен йөртүен искәртеп үттеләр. Аннан соң балалар мәдәният йортының һәр бүлмәсенә кереп, анда эшләүчеләрнең эшчәнлеге белән якыннан таныштылар, кызыксындырган сорауларын бирделәр. Соңыннан сәхнәдә укучыларны төрле музыка уен кораллары белән таныштыру булды. Алар хәтта үзләре дә уен коралларында уйнап карый алдылар, ансамбль дә булдырдылар. Укучыларга бу сәяхәт бик ошады, алар чын күңелдән ял иттеләр. Биредә чын мәгънәсендә талантлы кешеләр эшли. Саба халкын рухи баетуда, күңелен күтәреп ял иттерүдә аларның эше бәяләп бетергесез. Без аларга эшләрендә иҗади уңышлар теләп калабыз, сәяхәт өчен рәхмәт җиткерәбез.