19 апрель - Умырзая көне! Умырзаялар иң назлы, иң нәфис. матур, әз яши торган чәчәкләр.Алар иртән чыкса, кичә инде сула. Бүген без ике төркем балалары белән дә "Умырзаяларны саклыйк!" темасы астында шөгыль үткәрдек. Умырзая рәсемнәрен, чәчәкләрен тотып карадык , "Умырзая" җырын тынладык кушылып җырладык.

Боз катлавы эрегәч, җир өстенә
Умырзая чыга, карагыз:
Умырзая чыга,
Умырзая калка,
Умырзая суза сабагын.

Кечкенәләр дә үз итте бу чәчәкләрне!

Җылы язгы көннәр ешрак безне куандыра башлады.Кар эри, гөрләвекләр ага, кошлар кайта... Күңелләр матур җәйгә ашкына, шуңа кыш буе яуган карга булышырга булдык, бердәм булып өмәгә чыктык." Кыш буе безне сөендергән кар тизрәк эре дә, гөрләвек булып елгага, диңгез-океаннарга кушыл! Җәйгә шифалы яңгыр булып кабат безгә килерсен!" - дип, теләкләр теләп, тырышып эшлибез.

 Бакчабызда "Сыерчык оясы ясыйбыз" акциясе кызу  темплар белән башланып китте.Балалар үзләренең әтиләре, абыйлары, бабайлары белән бик матур сыерчык оялары ясап элделәр.Безнең авыл сыерчыклары бик бәхетле, алар инде ояларга урнашып, үзләренең матур җырларын суздылар...

Балалар белән тагын бер кирәкле эш эшләп алдык. Уен аша, җыелган, төрле чүпләрне төркемнәргә савытларга урнаштырырга өйрәндек. Балалар бик кызыксынып уйнадылар, өйрәнделәр.Тормышта да бу эш бик кирәкле булачак.

Бакчабызда "Макулатура җыябыз!" акциясе башланып китте. Балалар көн саен макулатура алып киләчәк. Бу безнең урмандагы бер агачны булса да кисмичә калдыруга өлешебез дип уйлыйбыз.

Безнең бакча балалары да Россия күләмендә үткәрелә торган сәламәтлек эстафетасына кушылды. Иртәнге гимнастиканы көн саен үткәрсәк тә, без аны бүген тагын да яхшырак итеп, тырышып эшләдек. Хәрәкәттә бәрәкәт, СӘЛАМӘТ булыйк!

Бүген бакчабызда "Эковесна 2021 акциясен күздә тотып "Бәләкәч, зур булып үс!" шөгылен үткәрдек. Нәни орлыкларга, гөл үсентеләренә зур булып үсәргә мөмкинлек бирдек. Кара, йомшак балчыкка бодай, арпа, солы, борчак чәчтек, суган, тамырланган гөл үсентеләрен утырттык. Җылы су сиптек тә кояшлы урынга куйдык. Хәзер без бу бәләкәчләрнең "әниләре" булдык инде, көн саен карап, тәрбияләп торачакбыз. Шундый зур эш эшләгәнебезгә бик шатбыз.Бәләкәч, зур булып үс!