Республикабызда старт алган "Музей язы" кысаларында мәктәбебездән  7 укучы Зарипова Г.М. җитәкчелегендә Биләр каласында атаклы химик А.Е. Арбузовның музей йортын сәяхәт кылды. Әлеге йортның бер бүлмәсе танылган химик А.М. Бутлеровның тормыш юлын һәм эшчәнлеген чагылдырса, 2 нче бүлмә тулысы белән А.Е. Арбузовның биографиясен, фәнни эшчәнлеген чагылдыручы экспонатлар белән истә калды.  Экскурсияне алып баручылар экспонатлар белән таныштыру уздырганнан соң, музейда булган һәркемнең хәтерен тест сораулары ярдәмендә дә тикшерделәр. тестлаштыруда катнашкан бөтен кеше истәлекле наклейкалар белән бүләкләнде. Укучыларыбыз Татарстаныбыз җиреннән чыккан әлеге фән әһелләре белән чын-чынлап горурланырга хаклы булуларын ассызыкладылар. 

А.Е. Арбузовның музей йортында булганнан соң, укучыларыбыз Изге чишмә тыюлыгына юл алды. Тыюлыкта ремонт, җәйге чорга әзерләнү эшләре барса да, килүче халык күп иде. Укучыларыбыз ,тагын да тирәнрәк тәэсирләр алу өчен, җәйге каникуллар чорында әти-әниләре белән ял һәм дини йолалар үтәргә монда килү теләге белән кайтыр юлга кузгалды. Тарихи Ватаныбызда булу беркемне дә битараф калдырмады

 Районыбызның Мамык  гомуми урта белем мәктәбе базасында тәрбия эшләре буенча директор урынбасарларының "Организация эффективного взаимодействия образовательных учреждений с родительской общественностью по проблемам воспитания" темасына багышланган семинары узды. Колмөхәммәтова З.Э. семинарның бик эчтәлекле һәм бүгенге көн өчен әһәмиятле проблемаларны колачлавын ассысызыклады.

-Гаилә һәм мәктәп бердәмлегенә багышланган сыйныфтан тыш чаралар, укучылар, ата-аналар һәм укытучылар катнашында уздырылган ата-аналар җыелышы, мастер-класслар нык уйланылган һәм тәэсирле булды, - ди ул семинар турында үз фикерләрен белдергәндә.

ТР Яшьләр эшләре, спорт һәм туризм министрлыгы "Сәләт" яшьләр үзәге тарафыннан оештырылган "Сәләткә нур булган  йолдызлар" укучыларның иҗади эшләре бәйгесенең йомгаклау кичәсенә мәктәбебездән Колмөхәммәтов Зөлфәт, Исмоилова Айгөл, Ганиев Фәдис, Әхмәдиева Рәзилә Казан шәһәренә чакырылды. Алар барысы да бәйгедә катнашучы шаһәдәтнамәсенә лаек булдылар.  Киләчәктә бу укучыларның чын йолдыз булып балкуларын телибез. Афәрин! Булдырасыз! Иҗади уңышлар Сезгә! Без Сезнең белән горурланабыз.

Рәсемдә Колмөхәммәтов Зөлфәткә "Идел" журналы баш редакторы  Рөстәм Галиуллинның мастер-класстан соң автографлы китабын тапшыру мизгеле

Мәктәбебездә ТР Нурлат шәһәре янгын сүндерү часте хезмәткәре Разыков А.А. укучылар белән янгын куркынычсызлыгы буенча укулар оештырды. Янгын сүндерү, сак хезмәтенең тарихыннан башланган сөйләшү җанлы әңгәмәгә әверелде. Патша Россиясендә үк дәрәҗәле хезмәткә әйләнгән янгын сүндерүчеләр бүген тагын да җаваплырак постларда: янгын сүндерү, кешеләрне коткару, кирәк булса, беренче ярдәм күрсәтү, бәла-каза вакытында бернинди табигый җайсызлыкларга карамый ярдәмгә ашыгу... Язгы җыештыру- санитар айлыкларда  ут белән бигрәк тә сак булырга кирәклеге төшендерелде, өй телефоннарыннан һәм кәрәзле телефоннардан янгын һәм сак хезмәте белән элемтәгә чыгу номерлары әйтелде. Шаярту теләге белән җыелган номерның кеше гомере өчен куркыныч булуы искәртелде. Янгын һәм сак хезмәткәрләре быел Россиядә әлеге хезмәт оешуның 3 гасыр ярымлык бәйрәмен билгели, аларга исәнлек-саулык, гаиләләрендә иминлек  барча кешеләргә бәла-казасыз гомер телибез. Сөйләшү ахырында Альберт Әхтәмович  үз киләчәкләрен әлеге һөнәр белән бәйләргә уйлаган яшүсмерләргә уку йортлары турында да әйтеп китте. Ә иң кызыгы янгын сүндерүче экипировкасын егетләрнең үз өсләренә киеп караулары булгандыр. Кунагыбыз янгын сүндерүче киеменең һәм коралларының үзенчәлекләре һәм өстенлекләре турында да бик кызыклы итеп сөйләде. 

Бу очрашу укучылар һәм укытучылар күңелендә бик матур хатирә һәм бәла-казасыз тормышка юллама булып озак сакланыр.

Мәктәбебездән 30 укучы Киекле авылы мәдәният сараенда балалар өчен район күләмендә оештырылган дини викторинаның куст этабында катнашты. Киекле, урта Чаллы, Кизләү авылларыннан җыелган укучылар арасында мәктәбебездән Сәлахова Зөһрә (1 кл.), Исмоилова А. (6 кл.) , Динмөхәммәтова Алсу (6 кл.) үзләренең җаваплары белән кызыксындыру бүләкләренә лаек булдылар. Ганиев Фәдис исә,  викторина сорауларына иң күп дөрес җавап  бирүче булып, җиңүчегә әзерләнгән истәлекле бүләккә лаек дип табылды. Катнашучыларны һәм җиңүчеләрне ихластан тәбриклибез, күңелләрендә иман нуры сүнмәсен!

 Мәктәбебездә Бөтендөнья сәламәтлек көненә багышлап "Хәвефсез тәгәрмәч" - юл йөрү кагыйдәләре, һәлакәткә очраучыларга беренче ярдәм күрсәтү, юлдагы бәхәсле хәлләрне чишү юлларын табу һәм велосипедта фигуралы йөрү күнекмәләрен исәпкә алу буенча ярыш узды. Ярышта 4 әр кешедән торган 5 команда катнашты. Иң көчле теоретиклар 6 нчы сыйныфлар, велосипедта иң оста йөрүчеләр - 5 ләр, ә инде беренче ярдәмне "иң скорый" һәм дөрес күрсәтүчеләр дип 7 нче сыйныф кызлары табылды. Афәрин! Юлларыгыз имин, тәннәрегез сәламәт, күңелләрегез гел күтәренке булсын!

Укытучыларыбыз бүген районыбызда уздырылган "Бердәм Россия" сәяси партиясе көне  кысаларында уздырылган чараларда актив катнаштылар. 

Бүген белем бирүдә чит ил (Сингапур) методикасын өйрәнү буенча укулар тәмамланды. Һәр төркем проектлау кысаларында үзләре сайлаган укыту структураларын укучыларга һәм әти-әниләргә тәкъдим итү өчен реклама постерларын яклады. Киләчәктә белем бирүне тагын да нәтиҗәлерәк итүдә бу беренче  һәм нәтиҗәле адым булды. Камиллеккә чикләр юк,  мәгарифне заман һәм чор белән бергә киләчәккә БЕЗ алып барабыз, хәерле сәгатьтә.

03.04-дә Андреевка төп гомуми белем мәктәбендә Киекле, Кизләү, Андреевка һәм Богдашкино авыллары мәктәп укытучылары өчен Сингапурча укыту технологисе структураларын өйрәнү буенча укулар оештырылды. Укуларны ММҮ методистлары Тарасова О.С. һәм Мингалимова Г.В. алып барды. Практик эшкә нигезләнгән уку күп күрсәтмәлелек, видео һәм аудиоязмалар белән баетылган иде. Укулар бик кызык, мавыктыргыч узды. Һәр укытучы 2 көнлек укулар барышында Сингапурча укыту структураларының үз фәне өчен иң кулайларын сайлап ала алгандыр.