15 нче апрельдә   И.Х. Садыйков исемендәге Балалар һәм яшьләр иҗаты сараенда Түбән Кама муниципаль районы  күләмендә укучы балалар арасында “Көйле, моңлы татар җыры” бәйгесенең  IV нче шәһәркүләм йомгаклау туры үткәрелде. Бу бәйге Түбән Кама муниципаль районы   мәгариф идарәсенең мәгълүмати-методик үзәк һәм Бөтендөнья татар конгрессының Түбән Кама бүлеге белән берлектә уздырылды. Бу бәйгенең максаты- телебезне, мәдәниятебезне саклау, укучыларда эстетик зәвык тәрбияләү. Гала концерттта 1-4 нче, 5-6 нчы, 7-8 нче сыйныфлар арасында җиңүче дип табылган  сыйныф коллективлары хор  белән катнашты; солистлар, дуэтларның чыгышлары тыңланды. 

   Чыгышлардан соң зал түземсезлек белән бүләкләү тантанасын көтте... I, II, III  урыннар алган солистлар, дуэтларны  һәм хор коллективларын бүләк алырга сәхнәгә берәм-берәм чакырып тордылар. Һәм, ниһаять, быелгы бәйгенең дә җиңүчеләре билгеле: Безнең мәктәптән  3 нче Б  сыйныфы укучылары хоры III  дәрәҗәдәге Диплом белән бүләкләнде.(Хор җитәкчесе: Краснова Л.А.) Шулай ук  III нче дәрәҗә лауреат Дипломы белән солистыбыз Мохтаров Хәйдәр  (8 нче Б сыйныфы)  бүләкләнде. Әхмәтҗанова Рания (3 нче Б сыйныфы), Закиров Солтан   (6 Б сыйныфы укучысы)  төрле номинацияләрдә җиңүче булдылар.

     Дипломнар белән бергә укучыларның һәрберсенә конверт та  тапшырылды. Боларның барысы өчен дә без Бөтендөнья татар конгрессының Түбән Кама бүлеге рәисе  татар җанлы Рөстәм Мәҗит улы Ганиевка бик тә рәхмәтлебез!

        Киләчәктә укучыларга иҗади уңышлар телибез!