12 октябрь көнне Яр Чаллы шәһәренең 52 нче урта гомуми белем бирү мәктәбендә «Бер күрешү – бер гомер» дип исемләнгән әдәби кичә булып узды. Шәһәрнең татар теле һәм әдәбияты укытучылары, мәктәп укучылары каршында ТР Язучылар берлегенең Яр Чаллы оешмасы җитәкчесе Ф.Сафин, шагыйрь Равил Рахмани, Чаллы төбәгендә яшәп иҗат итүче танылган каләм әһелләре Сирень Якупова, Айрат Суфиянов, Әлфия Ситдыйкова, Рәзинә Мөхияр чыгыш ясадылар. Шулай ук яшь каләм әһелләре Лилия Фәттахова, Сөмбел Әхмәтҗанова, Алия Корбановалар да үз шигырьләрен укып ирештерделәр. Кичәне шагыйрь Лилия Гыйбадуллина алып барды.

Очрашу шигырьләр уку һәм җанлы үзара сөйләшү рәвешендә булып, музыкаль чыгышлар белән дә үрелгән иде. Ф.Дәүләтбаев сүзләренә Ф.Сафин иҗат иткән «Хәтер көне»җыры биредә халыкка тәүге тапкыр тәкъдим ителде.

Әдәби чараның үзәгендә Хәтер көне темасы, әдипләрнең милләт, тел язмышы турында үтемле чыгышлары булды. Тамаша «Туган тел» җырын күмәк башкару белән тәмамланды.