Мәктәптә татар теле һәм әдәбияты атналыгы гөрләп үтте. Метод берләшмә укытучылары һәр класста төрле кызыклы чаралар уздырдылар. Бу чаралар Мәдәният елына, Туган тел көненә, шәһәребезнең  күренекле шәхесләре Вахит Имамов, Факил Сафин юбилейларына багышланган иде. Атналыкны йомгаклап, актлар залында зур концерт-тамаша уздырылды. Монда шәһәр программалары конкурсларында катнашып җиңү яулаган бик талантлы укучылар катнаштылар. Бәйрәм җыр-бию, шигырь уку, әкиятләрдән өзекләрне сәхнәләштерү белән чиратлашып барды. Тамашаны оештыруда барлык татар теле укытучылары катнашты, ә  мәктәпнең 10 нчы класс укучылары Заляев Айдар һәм Галимова Лилия алып бардылар.