13 февральдә студентлар М.Җәлил исемендәге Минзәлә педагогика көллиятендә «Якташым – милләт күркем» исемле студентларның гомумрәсәй  семинарында катнаштылар.

Семинар таләбе буенча, һәр студент үз төбәгеннән  чыккан берәр язучы, шагыйрь, яисә сәнгать әһеле турында доклад тәкъдим итәргә тиеш.

Безнең Яр Чаллы педагогика көллиятеннән студентлар Шәрифуллина Гөлназ «Факил Сафинның кояшлы иҗаты» (җит. – ф.ф.канд. Гарифуллина В.И.), Галиева Эльвина «Фирүзә Җамалетдинованың «Гомер тукталышлары» хикәясендә символик образлар» (җит. – ф.ф.канд. Карамова А.Җ),  Хаҗиева Алия «Якташым  Дамир Гарифуллин иҗатында милләт темасы» (җит. – ф.ф.канд.Минһаҗева Р.Ә) дигән докладлар белән чыктылар.

Чыгыш ясаучылар географиясе киң булды: семинарның беренче өлешендә Татарстанның төрле районнарыннан, РФ төбәкләреннән иллеләп доклад тыңланды.  Студентлар җитәкчеләре белән иҗади якын килеп, ныклап әзерләнгәннәр. Чыгышлар презентациядәге  музыка, җырлар, фотолар белән  баетылып, бик эчтәлекле итеп тәкъдим ителде.

Семинарда катнашучы һәр студент үз якташы турында шулкадәр горурланып сөйләде ки, «татар халкының күпме гаҗәеп талантлы, эшчән, әмма җирле, төбәк шәхесе буларак, исемнәре күләгәдә кала килгән тыйнак шәхесләре бар икән!» дип, эчке соклану белән тыңлап утырдык. Әлеге семинарның максаты да нәкъ  әнә шундый якташ шәхесләрне барлау, аларның талантын күреп бәяләү, милләт үсеше өчен керткән өлешләрен тану, эшчәнлекләрен пропагандалау. 

 Докладлар  тыңлангач, каһарман шагыйрь Муса Җәлил истәлегенә оештырылган митингта катнаштык.

Җәлил биографиясенә күз салсак, 1941 елның июлендә аны хәрби хезмәткә алалар. Башта Муса Казан гар­низонында хезмәт итә, аннары, Курск өлкәсендәге хәрби сәясәтчеләр әзерли торган алты айлык курсларга укырга җибәрелә. Курск өлкәсенә немецлар якынлашкач, курслар Татарстанның Минзәлә шәһәренә, хәзерге көллият бинасына күчерелә. Шул рәвешле, политруклар курсының 56 көнен Муса монда укып бетерә. Ә инде  1941 елның декабрендә, укуын бик яхшы билгеләргә тәмамлап, өлкән политрук сыйфатында фронтка озатыла.

Митингта сәнгатьле уку бәйгесендә җиңгән укучылар төрле телләрдә аның шигырьләрен яңгыраттылар. Шигырьләр укыганда, чакырылган ветераннар йөзендә хәтта күз яшьләре дә чагылды. Иң ахырда, уку алдынгылары каһарман Муса бюстына кызыл чәчәкләр салдылар.

Төшке аштан соң, актлар залында, көллият студентлары семинар кунакларын «2014 ел – Мәдәният елы» уңаеннан концерт номерлары белән сәламләгәч, сүзне мәртәбәле кунаклар – Бөтендөнья татар конгрессы вәкилләре: ТР районнарындагы татар иҗтимагый оешмалары белән эшләү бүлеге җитәкчесе – Данис Фәнис улы Шакиров, Конгрессның Башкарма комитетының матбугат хезмәткәре – ф.ф.канд. Гөлүсә Малик кызы Низаметдинова,  Татарстанның халык  артисты Фердинант Фәтхи дәвам иттеләр.

Алар семинарда катнашучыларны Бөтендөнья Татар Конгрессы эшчәнлеге белән таныштырдылар,  видеопрезентация күрсәттеләр.  Конгресс үткәргән бәйге-проектларны күзәтеп барырга, чараларда актив катнашырга чакырдылар.

Семинар эше халык артисты Фердинант Фәтхи башкаруындагы чын татарча, моңлы җырлар белән үрелеп барды. Фердинант абыйның берьюлы берничә кешене сәхнәгә чакырып, җитез генә күмәкле, биюле-җырлы тамаша оештырып, милли рухта ял иттерүе барыбызны таң калдырды, сокландырды.

Иң ахырдан, семинарның нәтиҗәсе буларак, татар телен дөнья стандартларына җавап бирерлек дәрәҗәдә өйрәтү-өйрәнү, ана телендә тәрбия бирү мөмкинлегенә ирешү юнәлешендә бергәләшеп эшләү, чын мәгънәсендә милли кадрлар үстерүгә хезмәт итү турында  карар-резолюция кабул ителде. Аның белән көллият директоры, ф.ф.канд. Миңлегөл Абдрахман кызы Мифтахова таныштырды.

Без, «2014 ел – Мәдәният елында» Минзәләдә башлангыч алган «Якташым – милләт күркем» гомумрәсәй семинарының эше дәвамлы булсын, ел саен үткәрелсен һәм милләт шәхесләрен барлауга, эшчәнлекләрен, исемнәрен халыкка танытуга  ярдәм  итсен, милләтебезне берләштерсен дигән теләктә таралыштык.

Резилә Минһаҗева,  Яр Чаллы педагогика көллияте укытучысы.