Без, Ягъни Сон яклары: Югары Сон, Түбән  Сон, Кече Сон балалар бакчасы коллективы белән "Питрау" Сабантуендагы кул эшләре күргәзмәсенә "Килбәтсез үрдәк" ("Гадкий утёнок") әкиятенә панно ясадык. Сабантуйлары күңелле, истә калырлык булып үтсен!

 Быел безнең Салахиев Булатыбыз 1 нче сыйныфка укырга керә, бүген  без аның белән дулкынландыргыч  мизгелләр кичердек.   Булат сиңа укуыңда зур уңышлар, ныклы сәламәтлек телибез. Мәктәптә дә уңышларың белән безне гел сөендереп торсаң иде.

 Бакчабызда бүген гөрләп Сабан - туе узды. Балалар бик теләп барлык уеннарда да катнаштылар: капчык киеп йөгерү,  әйбер кисү, ераклыкка йөгерү, кыршау әйләндерү, таяк тартышу, чүлмәк вату һ. б. бик күп кенә уеннар балаларның да, әти -әниләрнең дә күңелләренә хуш килде. Беркем дә бүләксез калмады. Ә без хәерле, имин җәйләр теләп, балаларны  җәйге чорга әти -әниләренә тапшырдык.

2015 - 2016 нчы уку елына балалар бакчасына киләчәк Кабирова Гөлсуны да кунакка чакырдык.  Гөлсу апаларны да, малайларны да үз итте, (кечкенә булса да) барлык уеннарда да актив катнашты: капчык киеп йөгерде, әйбер кисте,  чүлмәк ватты.

                        "Тузганак"

 "Өф!" - дип бер өргән идем,

 Очты китте, югалды,

 Тик иң кирәк өлеше -

 Тамыры безгә калды.

"Иҗади - сәнгать" белем бирү өлкәсенә караган рәсем эшчәнлегендә балалар "Тузганак"ны натурадан ясадылар.

 Бүген  Республикабыз мәктәпләрендә  чыгарылыш сыйныф укучылары өчен "Соңгы кыңгырау" шалтырады. 9 нчы һәм 11 нче сыйныф укучыларына бары тик уңышлар, саулык - сәламәтлек теләкләрнең иң -иң изгеләрен генә телибез.

 "Тылсымлы куллар"журналы  "Җиңүнең - 70 еллыгы" уңаеннан игълан иткән"Бабам батырлыгы" дигән бәйгедә катнашып, Рәимов Илзиребезне журналның  2015 нче елның май ае санында ( 3 нче бит) күрүебезгә без бик шатбыз!. Илзир алга таба да уңышлар сиңа!

 Бөек Җиңүнең 70 еллыгы уңаеннан уздырылган митингта катнаштык. Һәйкәлләргә чәчәкләр куйдык.

 Җиңүнең 70 еллыгын каршылау уңаеннан, "Иҗади сәнгать эшчәнлеге"ндә балалар белән котлау открыткалары ясадык. Былтыр 90 яшен тутырып арабыздан киткән, Сон ягының "Соңгы могиканы" - Ленинград блокадасының эчендә кайнаган беренче группа инвалид, сугыш ветераны - Низамов Гыйльметдин Низам улының шәхси киемнәрен - бигрәк тә орден - медальләрен таккан костюмын киеп карау һәр балада горурлык хисе тудырды.