21 февраль – Халыкара туган тел көне. Әлеге дата уңаеннан бүген безнең мәктәптә "И, гүзәл туган телем" дигән кичә узды. Әлеге кичәдә укучылар тел турында шигырьләр сөйләделәр, җырлар җарладылар. Тел турында мәкальләрне исләренә төшерделәр. Әлеге чара татарның гимны булган, Г.Тукайның "Туган тел" җыры белән тәмамланды.

Бүген, хәрби-патриотик айлык кысаларында "Аҗаган" уены үтте. Әлеге уенда 5-9 нчы сыйныф укучылары 2 командага бүленеп ярыштылар. Әлеге уенда укучыларның физик һәм интеллектуаль яктан көчләре сыналды. Тормыш иминлеге нигезләре, физкультура, георграфия фәннәреннән дә белемнәре сыналды. Уенда, Сөләйманов Ранис командасы җиңү яулады.

Февраль- мәктәп планында хәрби-патриотик айлык буларак билгеләп үтелә. Әлеге айлык кысаларында мәктәптә төрле чаралар үткәрелә. Шуларның берсе бүген үтте. Укучылар үзләре әзерләгән проектлар белән чыгыш ясадылар. 6-7 сыйныф укучылары "Минем гаиләм тарихында Бөек Ватан сугышы"  дигән темага плакатлар әзерләгәннәр иде, алар үзләренең бабалары кайда һәм кем булып сугышулары турында тәфсилләп сөйләделәр, ә 5 нче сыйныф укучылары "Бүгенге көн солдаты" дигән темага плакат ясап,  үзләренең әтиләре тыныч көндә кайда һәм кем булып хезмәт итүләре турында сөйләделәр. 8 сыйныф укучылары "Герой шәһәрләр" темасына,   9 сыйныф укучылары "Сугыш вакыты кораллары" дигән темага компьютер презентациясе әзерләп чыгыш ясадылар. Башлангыч сыйныф укучылары, "Солдатта булган диләр" дигән темага рәсемнәр күргәзмәсе оештырдылар.

Бүген 1 сыйныф укучыларының зур бәйрәме- Әлифба белән саубуллашу  кичәсе узды.  Бәйрәмгә укучыларның әниләре дә килде, алар нәниләрне котлап бүләкләр өләштеләр. Әлеге чара бик кызыклы итеп оештырылган иде, укучылар "Әлифба" дигән корабка утырып диңгездә сәяхәт иттеләр, тукталышларда төрле биремнәр үтәделәр,  шигырьләр сөйләделәр, җырладылар. Белем ачкычын исә, киләсе елга укырга керүче балалр бакчасында тәрбияләнүче балаларга тапшырдылар. Укучыларга әлифбаны тәмамлау турындагы таныклык- диплом бирелде. Әлеге чараны 1 нче сыйныф җитәкчесе Мөхетдинова А.Н. оештырды һәм үткәрде.

Бүген укучыларыбыз, район сәхнәсендә "Йолдызлык -2013" фестиваленең зона этабында чыгыш ясадылар. Фестивальдә катнашкан 15 укучыбыз,  "Вокал- соло", "Вокаль ансамбль", "Конферанс" номинацияләрендә үз көчләрен сынады. Шуларның 13-е, фестивальнең район турына чыгу бәхетенә иреште. Аларга уңышлар телибез! 

"Ел укытучысы-2013" бәйгесендә безнең мәктәптән инглиз теле укытучысы  Шаһиева А.Г. катнашты. Район турының зона этабында ул  3 нче урынга лаек булды. Хезмәттәшебезне чын күңелдән котлыйбыз.

Бөек Ватан сугышының иң дәһшәтле көрәше- Сталинград сугышы тәмамлануга быел 2 февральдә 70 ел булды. Әлеге дата уңаеннан мәктәптә тематик сыйныф сәгатьләре үткәрелде. Чираттагысы бүген 6 нчы сыйныфта узды. Сыйныф җитәкчесе Хәсәнова Э.Г. укучыларга әлеге көрәшнең тарихын сөйләде, укучылар презентация әзерләгәннәр иде.

Бүген, 9 нчы сыйныф укучысы Сөләйманов Ранис ТР укучыларының IX спартакиадасы кысаларында, 1997-1998 елгы егетләр арасында уздырылучы волейбол ярышларының зона турында район җыелма командасы составында чыгыш ясар өчен Тәтеш районына китте. Аңа уңышлар һәм хәерле юл телибез

Бүген, 4 нче сыйныф укучылары, 2010-2015 нче елларга планлаштырылган Татарстан Республикасында белем бирүнең стратегик үсеш чараларын тормышка ашыру максатыннан уздырылучы чара кысаларында, математика һәм татар теле фәннәреннән  тест биремнәре эшләделәр. Иртәгә исә әлеге тестлар рус теле һәм әйләнә-тирә дөнья фәннәреннән уздырылачак. Сынауда 10 укучы катнаша.

2 нче февраль көнне, 9 сыйныф укучылары һәм аларның әниләре белән берлектә җыелыш булды. Әлеге җыелыш, ТР ның Мәгариф һәм Фән министрлыгында 2013 нче елның 15 гыйнварында чыккан 31/13 №лы боерык "Об утверждении Порядка организации и проведения в 2013 году ГИА обучающихся, освоивших основные общеобразовательные программы основного общего образовани, с использованием механизмов независимой оценки знаний путем создания Государственной экзаменационной комиссии  РТ" ка таянып алып барылды. Җыелышта 9 нчы сыйныф укучылары, аларның әниләре, укучылар имтихан бирә торган фән укытучылары, мәктәп җитәкчелеге катнашты. Укыту тәрбия эшләре буенча директор урынбасары Э.Г.Хәсәнова югарыдагы боерыкка  һәм район мәгариф бүлегеннән җиткерелгән мәгълүматларга таянып  имтиханнар һәм аларны бирү тәртибе белән таныштырды. Фән укытучылары да үз фәннәреннән имтихан бирү тәртипләре белән таныштырып чыктылар.