Туган  телебезне укучыларыбызга өйрәтү, аңа карата мәхәббәт тәрбияләү укытучыдан зур осталык, түземлелек сорый. Безнең бурыч балаларда милли үзаң, горурлык хисләре булдыру, һәм, иң мөһиме әхлаклы шәхес тәрбияләү. Без укучыларыбыз өчен укытучы апа гына түгел, без-киңәшче дә, ярдәмче дә.

         Туган тел-милли яшәешнең төп шарты. Тел язмышы - милләт язмышы белән тыгыз бәйләнгән. Без Татарстан җирендә яшибез икән, аның һавасын сулыйбыз икән, димәк без дә үз телебезне яхшы белергә тиеш.

          Безнең педагогик эшчәнлек укыту кысаларында гына калмый, укыту-тәрбия эшендә сыйныфтан тыш эшләргә дә зур әһәмият бирелә.

         Укучыларыбызны милли традицияләр, бәйрәмнәр, бөек кешеләр белән таныштыру максатыннан мәктәбебездә төрле чаралар үткәрелә.

          21 нче февраль-Халыкара  Туган тел көне буларак билгеләп үтелә. Туган тел атналыгы кысаларында мәктәбебездә дә һәм районүзәк китапханәсе белән берлектә төрле чаралар уздырдык. Мәктәбебездә “Туган телдә дәшсәм генә,Туган җирем мине аңлар”дип исемләнгән туган тел бәйрәме үткәрелде. Бу бәйрәмдә 3АБ, 5АБ, 9А, 10  сыйныфы (татар төркеме) укучылары зур активлык күрсәтте. Башлангыч сыйныфы татар һәм рус төркеме укучылары әкиятләр сәхнәләштереп күрсәттеләр. Татар халык әкияте “Өч кыз”( 3Б сыйныфы тат.төркеме)(җитәкче Хөсәенова Ч.Р.), татар халык әкияте”Шалкан”(1Б сыйныфы рус төркеме), А.Алиш “Куян кызы”(2Б сыйныфы рус төркеме), татар халык әкияте”Төсләр”(3А сыйныфы рус төркеме)(җитәкче Шакирова Л.И.)

         Газиз туган телебез- татар телен кадерлик, яклыйк, саклыйк, чарлыйк, сөеп үстерик. Теле барның- милли юлы бар, милли йөзе бар, шәхес буларак абруе, кадер-бәясе, хөрмәте бар.