23   февраль   көнне    Балтач  гимназиясенең  хоккей  мәйданчыгында  укучылар, укытучылар, әтиләр  һәм гимназияне тәмамлаган  егетләр  командалары  арасында  хоккей  турниры  булды.

     Турнир  2003 елдан  бирле  һәр  елны  уздырылып  килә. Беренче  турнирда  3  команда (укучылар, әтиләр, гимназияне тәмамлаучылар) катнашкан булса, быелгы  10 нчы турнирда 5 команда  ярышты.

     Беренче  уенда  укучылар  һәм  укытучылар  командалары очрашты. Исәп 6:4, укытучылар  файдасына булды.  Икенче уенда  әтиләр  һәм  “Выпускник 2”  командалары  уйнады, 4:0 исәбенә    “Выпускник 2”   җиңде.

    Өченче  уенда  укытучылар  белән  “Выпускник 1”   очрашты,  6:0 исәбенә  “Укытучылар” командасы  җиңү яулады.

    Турнирның  финалында   “Укытучылар”  һәм “Выпускник 2”    командалары  очрашты.  Кискен  көрәштә  укытучылар  җиңеп чыкты.

    Турнирда  катнашкан  һәр  уенчыга, Ватанны саклаучылар  көне  белән  котлап, истәлек  бүләкләре  тапшырылды.

     Матур табигать   шартлары, һава  торышы  да  турнирның  оешкан  төстә  үтүенә  этәргеч бирде.

     23   февраль   көнне    гимназиягә  бәйләнеше  булган  һәркем  боз  өстенә чыгып  бу  уеннарда  катнаша  алды. Турнир Балтач гимназиясенең  укучылары, укытучылары  һәм  гимназияне  тәмамлаучылары  белән  очрашуга  сәбәпче  булды,  аларның  дуслык  җепләре  тагын  да  ныгыды.