Мәктәп бусагасын атлап, зур тормышка чыгып китәргә торган укучы, аның әти-әнисен иң нык борчыган сорау - кем булырга? -дигән сораудыр. Күңелеңә ошаган һөнәрне тапсаң гына, үзеңне профессиональ яктан уңышка ирештем дип әйтеп була бит. Әти –әниләр дә, укытучылар да, укучының сәләтләрен, кызыксынуларын истә тотып, төрле- төрле киңәшләр бирә.

Өлкән сыйныфларда бу юнәлештә актив эш алып барыла. 15нче гыйнварда 10-11нче сыйныфлар өчен райондашыбыз Илһам Шәрипов белән очрашу булды. Ул хәрби һөнәренең үзенчәлекләре турында сөйләде. Вертолет очучыларын әзерләүче инструктор буларак, хәрби эштән курыкмаска, туган илне саклау – чын ир-егетләр генә булдыра торган җаваплы бурыч икәнлеген ассызыклады. Сызрань шәһәрендәге үзе эшләгән хәрби училищега укырга керү шартлары белән, анда уку тәртибе белән таныштырды. Укучылар үзләренең күпсанлы сорауларына җавап тапты бу очрашуда.