6нчы мартта ЮИД отряды оешуга 50 ел булды. Ярты гасырлык юбилейлары уңаеннан Балтач гимназиясе һәм Балтач мәктәбеннән йөзгә якын бала район мәдәният үзәге каршында флешмоб үткәрделәр һәм шоферларга төрле буклетлар өләштеләр. Үз эшләренә карата укучылар нинди фикердә? ЮИД отрядында булу аларга нинди файда китерә? Бүген алар бу сорауларга үзләре җавап бирәләр.
Зарифа Махмутходжаева, Балтач гимназиясенең 7нче Б сыйныфы укучысы: «ЮИД отрядындагы эшчәнлегебез  юл хәрәкәте кагыйдәләрен өйрәнү, районда яшәүчеләргә шул кагыйдәләрне искәртүне үз эченә ала. «Ерактан балкып тор!», «Җәяүле», «Бала – төп пассажир», «Игътибар – балалар!», «Балаларның киләчәге сезнең кулларда», «Юл хәрәкәте кагыйдәләрен бел!» кебек акцияләрне актив рәвештә үткәреп торабыз. Шулай ук «Юл транспорт һәлакәтендә зыян күрүчеләр көне»н һәм «Җәяүлеләргә багышлау» чараларыннан да читтә калмыйбыз. «ЮИД тавышы», «ЮИДның иң яхшы отряды», «Иминлек тәгәрмәче», юл хәрәкәте кагыйдәләре буенча олимпиадаларда катнашабыз. Агитбригада белән балалар бакчаларына барабыз. Әлеге отрядка өч ел йөрү дәверендә мин үзебезнең отрядны һәм анда башкара торган эшләребезне бик яратып өлгердем һәм болар өчен педагог-оештыручы Равилә Шәриповага рәхмәтемне белдерәм».