15 мартта гимназиянең 5 нче а сыйныфы  Салавыч урта мәктәбе базасында үткәрелгән республика семинарында катнашты. “ Икенче буын стандартларга күчү шартларында татар теле һәм әдәбияты укытуның актуаль мәсьәләләре: теория, инновация, практика һәм технологияләр” темасына уздырылган бу чарада  татар теле һәм әдәбияты укытучысы Габделганиева Ч.М. шушы сыйныфта  “ Бәхет кайда була?”  исемле  әдәбият дәресе  күрсәтте. Татарстанның төрле районнарыннан, Удмуртия, Мари – Эл республикаларыннан килгән кунаклар   һәм  КФУ укытучысы,  укучылар  шөгыльләнә торган  “Татар теле”дәреслеге  авторы Харисова Ч. М.   балаларның   абстракт төшенчәләр турында фикерли белүен, иҗади активлыгын, гадәти булмаган  шартларда югалып калмавын билгеләп үтте.  Алар фикеренчә, дәрестә сөйләшәчәк  тема буенча  әти-әниләргә алдан хат язарга тәкъдим ителүе , балаларга өй эше итеп җавап хаты язарга кушылуы тәрбияви яктан бик отышлы булды. 

       Дәрестән соң  Габделганиева Ч. М.“ФДББС кысаларында  татар теле дәресе” темасына методик семинар, ә Идрисова Н. М. “ФДББС кысаларында рус телендә белем бирүче мәктәптә татар телен укытуның коммуникатив нигезләре  “ дип исемләнгән  мастер-класс уздырды. Аларда катнашкан укытучылар үз эшләрендә  куллану өчен  файдалы мәгълүмат алуларын билгеләп үтте.