22нче май көнне район мәдәният үзәге сәхнәсе шау-гөр килеп торды. Агымдагы уку елы ахырына якынлашканда, традиция буенча, гимназия җитәкчелеге укучылар, укытучылар эшчәнлегенә нәтиҗәләр ясый. “Хезмәтенә күрә хөрмәте” дигәндәй, үз алдынгыларын барлый, хөрмәтли. Уку алдынгыларына, олимпиада, бәйге-конкурсларда, төрле спорт ярышларында  җиңү яулаган укучыларга бар халык алдында директор кулыннан бүләкләр алу зур дәрәҗә булды. Болар барысы да  концерт  номерлары белән үрелеп барды. Дәртле биюләр, моңлы җырлар, шаян нәфис  сүз осталары чыгышы бәйрәмне тагын да ямьләндерде. Тамашачылар әлеге чарадан гимназиянең тырыш укучыларына,  уңган  мөгаллимнәренә сокланып, оештыручыларга рәхмәт әйтеп, күтәренке кәеф белән таралыштылар.