Әле кайчан гына башланган тагын бер уку елы узып бара. Май ае - уку елы дәвамында өйрәнгәннәргә, башкарылган эшләргә нәтиҗә ясый торган чор. Гимназиядәге  шундый чараларның берсе 2нче май көнне район мәдәният үзәгендә үтте. “Гаилә – бәхет ачкычы” дип исемләнгән  иҗат концерты иде ул. Укытучылар, укучылар һәм әти-әниләрнең бердәмлеген күрсәткән  концерт бер йотым су кебек кенә булды. Берсеннән - берсе матур, зәвыклы, эчтәлекле  җыр-биюләр, нәфис сүзләр, сәхнәләштерүләр мизгел эчендә үтте дә китте. Гимназия коллективы, укучылар һәм әти-әниләр зур, бердәм, тату гаиләне хәтерләтте. Тамаша кылырга килгәннәр бергәлектә көч икәнлегенә инанып, гимназиядә белем һәм тәрбия алучы балалары, оныклары өчен куанып таралыштылар.