Соңгы кыңгырау бәйрәмен кояшлы да, матур да көн белән каршы алдык. Гадәттәгечә Балтач гимназиясендә сыйныф укучыларын чакырганда аларга кыскача гына характеристика биреп, һәрберсенең шәпский бер ягын ассызыклыйлар. Иң зәвыклы, иң оригиналь, иң гүзәл һәм башка шундый төшенчәләр саналган мәлдә күлдә йөзгән аккошлардай егетләр һәм кызлар калган укучылар алдыннан үтте. Әлеге бәйрәмгә район башкарма комитеты җитәкчесе Рамил Шакиров, ветеран укытучылар, әти-әниләр тамаша кылды. Гимназия директоры Ренат Мөхәрләмов ел буе ирешелгән уңышлары белән уртаклашып, мактанырлык җиңүләребез бар дип горурланды. «Форпост» җитәкчесе Фердинанд Гыйлемҗанов ел буе әлеге юнәлештә яхшы эшләгән балаларны бүләкләп үтте. Унберенчеләрнең беренче сыйныф укытучылары алар белән булган истәлекләрен барлап, беренче дәфтәрләрен бүләк иттеләр. Беренчеләрнең унберенчеләргә әйтелгән сүзләре, багышланган шигырьләре һәркемнең күңелен күтәрде. Хөрмәтле укучылар, һәрбарчагызга имтиханнарыгызны уңышлы тапшырып, алардан чыкканда бәйрәмнән чыккандай үзегезне хис итәргә язсын.