Без, Балтач гимназиясенең 6нчыА сыйныфы укучылары, Кәрим Тинчурин исемендәге театрга “Эх алмагачлары!” дигән спектакльгә бардык. Бу -  театрга безнең беренче сәяхәт. Театр бинасы безне таң калдырды. Үзебезгә таныш һәм таныш булмаган артистларның стенага эленгән фотосурәтләрен күрдек. Бу көнне Нуретдин Нәҗмиевнең 70 яшьлек юбилее да бәйрәм ителде. Аны бик матур итеп котладылар да спектакль башланды. Сәхнәдә барган күренеш безгә бик ошады,  күзне дә ала алмыйча утырдык. Артистларның шулкадәр оста уйнавына сокландык. Урыннарыбыз балконда иде. Безнең янда тәрҗемәче булмәсе урнашкан иде. Тәрҗемәче, спектакль башлангач, актёрларның бөтен әйткән сүзен русчага тәрҗемә итеп бара иде. Без тәнәфестә шул апайны әз-мәз сөйләштердек һәм һөнәренең үзенчәлекләре турында сораштык. “Тәрҗемәче рольләргә бүлеп укый ул, бөтен связкалар бетә”,- ди. Бу сәяхәт безнең  хәтердә озак сакланыр.