Менә язгы каникуллар да үтеп китте.  Кыска гына булса да күп төрле спорт ярышлары да, консультацияләр дә, төрле кичәләр дә булып узды бездә. Ә иң күңелле  ял 8 нче сыйныфларга насыйп булды.  Алар телевизион “Тамчы – Шоу” уенында уңышлы катнашканнары өчен Г. Камал театрына чакыру белән бүләкләнгән иделәр. 31 нче март көнне класслары белән башкалабыз Казанда истәлекле урыннарны карап,  педагогика фәннәре докторы, профессор Хуҗиәхмәтов Әнвәр Нуриәхмәтович белән очрашып, Камал театрында  “Бабайлар чуагы” исемле комедия карап кайттылар алар. Шушындый ял бүләк иткәннәре өчен 8 нче класс укучылары мәктәп дирекциясенә, класс җитәкчеләре һәм экскурсиягә алып барган укытучыларга, автобус шофёрына рәхмәтләрен белдерделәр. Без дә укучыларыбызны уңышлары белән кабат котлыйбыз, алга таба да зур җиңүләр насыйп булсын сезгә дигән  теләктә калабыз.