25 май Татарстан Республикасы мәктәпләренең 20 меңгә якын укучысы өчен мәктәп кыңгыравы соңгы тапкыр яңгырый. Дәресләр, тәнәфесләр, өй эшләре – барысы да артта кала. Әлеге мизгелләрне сез кайчан да булса моңсулык белән искә алырсыз. Ә бүген исә – бары дулкынланулы шатлык. Тизрәк олы тормышка аяк атлыйсы, мөстәкыйль буласы килә. Ул нинди булыр – бары үзегездән тора.
Республиканың белем бирү учреждениеләрендә һәр укучыга үз алдына куйган максатларга ирешү, потенциал мөмкинлекләрен тулусынча ачу өчен бөтен шартлар тудырылган. Татарстан Республикасы хөкүмәте белем бирү системасына гаять зур игътибар бирә. Аның үсешенә зур суммада акча бүлеп бирелә. Ләкин бер җиһаз да, никадәр генә заманча булмасын, балаларны һәм үзенең хезмәтен яратучы педагогны алыштыра алмый.
Кадерле укытучылар! Сезгә рәхмәтнең иң зурысы! Үзегез тәрбияләгән укучыларга сез белем, тәҗрибә, җан җылысы бирдегез, ә бүген аларның уңышлары өчен шатланасыз һәм горурланасыз. Ышанам, мәктәпне тәмамалаучы һәр укучыгыз, еллар үткәннән соң, үзенең туган мәктәбен сагынып искә алачак.
Кадерле чыгарылыш укучылары! Берничә көннән сезне җитди сынау – дәүләт имтиханнары бирү көтә. Аларны уңышлы тапшыруыгызны һәм тормышта дөрес юлны сайлавыгызны теләп калам. Ата-аналарыгызның һәм укытучыларыгызның өметләрен аклавыгызны телим.
Уку елы ахырына якынлашты. Алда – җәй, барлык укучылар өчен көтеп алынган каникуллар һәм гаять үзенчәлекле вакыйга – Казанда Бөтендөнья студент уеннары. Безнең укучылар һәм студентларның яхшылардан яхшылары, волонтер буларак сайлап алынганнары, Универсиада – 2013 не үткәрүдә иң актив ярдәмчеләр булачак. Ә инде һәрберебезнең уникаль спорт бәйрәменең шаһите булу мөмкинлеге бар. Бөек тарихи вакыйгада катнашу мөмкинлеген кулдан ычкындырмагыз.
Казанда үтәчәк Бөтендөнья студент уеннары спорт һәм сәламәт яшәү рәвешен алга таба үстерү өчен этәргеч булачагына тирән ышанам.
Барыгызның да яхшы ял итүен һәм яңа ачышларга, казанышларга көч җыюын теләп калам.
Сезгә уңышлар һәм үз көчегезгә ышану юлдаш булсын