Яңа мәктәптә укый башлавыбызга атна үтеп тә китте. Мәктәбебезнең ачылуын бик зарыгып көткәнгәме, әллә инде аның матурлыгына, уңайлылыгына, ышанып бетмәгәнгәме бер атна бер көн кебек кенә тоелды әле безгә. Укучыларыбызның әти-әниләре дә мәктәп белән танышып, кызыгып киткән иделәр. Бүген исә мәктәбебезгә иң кадерле кунакларыбыз, мәктәп нигезендә дога кылып, төзүчеләргә хәер-фатихасын биргән авылыбызның мөхтәрәм картлары  килде. Һәр бүлмәгә кереп, сокланып та, гаҗәпләнеп тә, сөенеп тә йөрде алар. Яңа мәктәпләрдә яңа уңышлар, белемле балалар, тыныч көннәр теләде алар.