Авылыбызда патриотик тәрбиягә игътибар арта бара. Шушы көннәрдә мәдәният йортында армия сафларына алынучы 4 егетебезне озату кичәсе оештырылды. Әлеге кичәдә элекке солдатлар да, армиягә китүче егетләрнең әтиләре дә,  классташлары да, аларның класс җитәкчеләре дә, авыл советы җитәкчесе дә матур теләкләрен җиткерде. Алдагы көнне генә армия сафларыннан кайтып төшкән авылдаш егетебезнең чыгышы һәм  авылыбыз үзешчәннәренең матур җырлары бәйрәмгә ямь өстәде. Кичәне оештырган мәдәният хезмәткәрләренә авыл халкы зур рәхмәтен белдереп, залны көчле алкышларга күмде. Ә булачак солдатларга хәерле юл, тыныч көннәр теләде.