Бүген мәктәбебездә Татарстан Республикасында хәрби батырлык һәм хезмәт фидакарьлеге елын ачу тантанасы үтте. Чарада махсус хәрби операциядә катнашкан авылдашларыбызның әниләре, Әфган сугышы каһарманнары да катнашты. Тантананы мәктәбебез директоры Хәкимҗанов Хәмит Гәзим улы ачып җибәрде. Әлеге чарада Әтнә районы башкарма комитеты җитәкчесе Каюмов Айрат Фәнил улы, Арча һәм Әтнә районнарының хәрби комиссары подполковник Иванов Сергей Павлович, Күәм авылы үзидарә рәисе Самигуллин Ленар Әдһәм улы укучыларны, килгән кунакларыбызны бәйрәм белән котлап теләкләрен җиткерделәр. Чараның тагын бер истәлеге булып, хәрби операциядә һәлак булган авылдашыбыз, мәктәбебез укучысы Хәкимҗанов Хәлил Хәмбәл улы "Батырлык ордены" белән бүләкләнде. Аны Сергей Павлович Хәлилнең әнисе Надия апага тапшырды. Әфганстан сугышы каһарманы Илһам абый Шакиров һәм Надия апа Хәкимҗанова укучыларга якты теләкләрен җиткерделәр. Бәйрәм укучылар шигырьләре һәм җырлар белән үрелеп барды. 3 нче сыйныф укучысы Низамов Альберт башкаруында "Шли солдаты на войну" җыры бәйрәмгә патриотик рух өстәде. Тантанадан соң укучылар өчен бозда киез итек киеп хоккей ярышы оештырылды. Уен Хәлил Хәкимҗановның якты истәлегенә багышланды.