Татар халкының яраткан шагыйре Габдулла Тукайның 140 еллыгы уңаеннан мәктәбебездә узган "Тукай рухы яши безнең күңелләрдә" исемле очрашу кичәсенә, Тукай иҗатын тирәнтен өйрәнгән, аның шигырьләре белән илһамланып үзе дә иҗат юлына баскан, Фәизова Фирая Сафа кызы килде. Фирая ханым Әтнә кызы, Татарстанның атказанган укытучысы, Каюм Насыйри исемендәге премия лауреаты, Мәгариф отличнигы.Үзләренең нәсел шәҗәрәсен өйрәнгәндә ул тамырларының Г. Тукайга барып тоташканын ачыклый һәм эзләнү эшенә керешә. Очрашуга ул тирән эчтәлекле презентация әзерләп килгән иде.Әтнә мәктәбендә укыган еллары, яраткан укытучылары турында тәфсилләп сөйләде. Аның чыгышын тыңлап, Г. Тукай турында яңа мәгълүматлар ишеттек, белемнәребезне арттырдык. Фирая апа үзе иҗат иткән "Сөекле Тукайга" исемле шигырен дә укыды.Ул әле киләчәктә дә Тукайның иҗат һәм тормыш юлын өйрәнәчәген, эзләнү эшләрен дәвам итәчәген әйтте.