Олы Әтнә урта мәктәбенең 1 нче А һәм 1 нче Б сыйныфы укучылары Әлифба бәйрәме уздырды. Кунакка әти-әниләрне дә чакырдылар. Белем иленә аяк баскан һәм беренче хәрефләрне танырга, иҗекләп укырга өйрәнгән балалар тормышында бу зур вакыйга. Алар уку елы дәвамында хәреф танырга, язарга өйрәнеп, бүген укытучылары, әти-әниләре каршында беренче имтиханнарын тоттылар, уңышлары белән уртаклаштылар, һөнәрләрен күрсәттеләр. Мәктәп директоры Гөлия Наилевна беренчеләрне, аларның әти-әниләрен, укытучыларын зур бәйрәм белән котлады. Бәйрәмдә укучылар башкаруындагы матур җыр-биюләр, сәнгатьле итеп шигырь сөйләүләр аларның күп нәрсәләргә өйрәнүләрен күрсәтте.  Укучыларның чыгышларын караганда, аларның әти-әниләре балаларының белемгә омтылышларын, иҗади сәләтләрен күреп, ихластан сөенделәр һәм аларга әлеге бәйрәмдә матур теләкләрен ирештерделәр. Балаларның беренче укытучылары Лилия Равил кызына һәм Талия Фәнис кызына олы хөрмәтләрен белдерделәр һәм тырыш хезмәтләре өчен рәхмәт әйттеләр. Балалар мәктәп дирекциясеннән, әти-әниләрдән, укытучы апаларыннан матур бүләкләр кабул итеп алдылар. Беренче җиңүегез белән, кадерле  1 нче сыйныф укучылары!!!