Бала тәрбияләү – гаилә, мәктәп, җәмәгатьчелек алдында торган иң җитди, мөһим мәсьәләләрнең берсе. Белем учреждениеләре белән гаилә арасындагы бәйләнешне ныгытуда ата-аналар комитеты гаять зур роль уйный. Буген мәктәбебездә сыйныфларның ата-аналар комитеты җитәкчеләре белән очрашу булып узды. Очрашуда Саттарова Лилия Марс кызы “Новогодняя карусель чудес” исемле мастер-класс уздырды. Ул – мәктәбебезнең ата-аналар комитеты җитәкчесе дә. Әниләр узара бик теләп аралаштылар, фикер алыштылар. Очрашу чәй өстәле янында  дәвам итте. Мәктәп тормышында актив катнашкан әниләргә мәктәп җитәкчелеге рәхмәт хатлары тапшырды. “Сез һәрвакыт хәрәкәттә, уйлап табуда. Сезнең кебек актив кешеләр тормышны алга этәрә. Мәктәбебез тормышының гөрләп торуында, алга баруында Сезнең өлешегез бик зур. Киләчәктә дә белемгә, иҗатка омтылышлы яшьләр тәрбияләүдә кулга-кул тотынып эшләрбез дип ышанабыз”,- дип билгеләп узды мәктәп директоры Голия Наил кызы. Дөрестән дә, тик хезмәттәшлек итеп, ярдәмләшеп эшләгәндә, балага бердәм таләпләр куелганда гына уңай нәтиҗәләргә ирешергә була.