Безнең Иске Төрнәле балалар бакчасында кечкенә генә «Урман почмагы» бар. Анда каен, чыршы, шомырт, миләш агачлары, балан, чия, кара һәм кызыл карлыган, кура куаклары үсә. Без елның дүрт фасылында да шул агач һәм куакларны күзәтеп, балаларның белемнәрен ныгытабыз, агачларны сакларга өйрәнәбез. Балалар яз көне җимеш агачларының чәчәкләрен күзәтеп, аларның матурлыгына соклансалар, кыш көннәрендә аларның җимешләренең кошларга азык булып, никадәр файда китерүен күзәтәләр. 

Шөгыльләрдә алган белемнәрне дә урман почмагына экскурсиягә чыгып ныгытабыз. Менә шулай, балалар, табигать белән якыннан танышалар, гадәти әйберләрдән дә яңалык күрергә,әйләнә- тирәнең матурлыгын тоярга, табигатьне сакларга өйрәнәләр. 

Безнең максат: балаларда урманга һәм аның байлыкларына сак караш тәрбияләү;балаларның урман, андагы тереклек турында белемнәрен тирәнәйтү, табигатьнең кеше тормышындагы әһәмиятен аңлату, логик фикер йөртә белү сәләтен үстерү.

Һәр ел саен һәйкәл янында балалар белән бергә җыелып, 9 май – Җиңү бәйрәмен искә алабыз.Быел да сугышта һәләк булган авылдашларыбызны, сугыш ветераннарын искә төшереп, шунда кечкенә генә бәйрәм ясадык, балалар шигырьләр сөйләделәр, венок  куйдык.Ил – күгебезнең тынычлыгы, иминлеге өчен без Бөек Ватан сугышында катнашкан бабаларыбызга рәхмәтле.

Район күләмендә үткәрелгән, интернет аша узган чараларда безнең балалар бик теләп катнашалар. #ТукайГеройлары Арча2021 исеме астында бик күп фотолар инстаграм  челтәрендә урнаштырылды. Аеруча интернет аша узган чаралар балаларны, ата- аналарны  нык кызыксындыра.

Балалар белән бергәләп, авылыбызны әйләндек. Чишмәләрне карадык, табигатьне күзәттек.

Бүген бакчабызда татар  халкының бөек шагыйре Габдулла  Тукай  тууына 135 ел уңаеннан бәйрәм иртәсе булды. Бәйрәмдә балалар  Тукай геройлары булып киенделәр, әсәрләрен сәхнәләштерделәр.Балалар Тукай иҗат иткән матур шигырьләр  сөйләделәр, җырлар җырладылар. Бик матур биюләр биеп, уеннар уйнап бәйрәм бик күңелле  узды.

Безнең балалар бакчасыннан- Галиев Самир "Шигьриятнең якты йолдызы" конкурсында катнашып, уңышлы чыгыш ясап кайтты.

Язга керү белән,  гадәттәгечә, әйләнә-тирәбезне тәртипкә китерү, чүп-чардан арындыру эшләре башлана.  19 апрель  көнне  бездә  территорияне чистарттык. Күңелебез чиста булса – әйләнә-тирәбездә дә чиста булыр!

Күп санлы заманча уйлап табулар автоном чыганакларына мохтаҗ булган энергия – аккумуляторларда һәм батарейкаларда. Тик иртәме яки соңмы һәр батарейка сафтан чыга һәм аны ташларга кирәк була. Әлеге кечкенә матдәләрнең әйләнә-тирә мохиткә һәм кеше сәламәтлегенә ни дәрәҗәдә көчле тәэсир иткәнен күпләр әле белми. Шул уңайдан безнең балалар бакчасында “Батарейканы тапшыр - планетаны коткар “ дигән экологик акция үткәрелде. Барлык төркемдә тәрбияләнүче балалар һәм аларның әти-әниләре батарейкаларны утильләштерүгә алып килделәр. Безнең акция, анда катнашучыларга  ташланган батарейкаларның туфракка, үсемлекләргә һәм хайваннарга зыян китерүен аңларга  һичшиксез ярдәм итәр.

Безнең тагын бер язгы бәйрәмебез бар. 12 апрель

Космонавтика көнен билгеләп үтәбез. 1961 нче елның 12 апрелендә, дөньяда беренче буларак, бортына кеше утырган “Восток” космик корабле җир тирәли орбитага чыгарылды. Бу кеше-очучы космонавты Юрий Алексеевич Гагарин. Ул илебез хөкүмәте тапшырган эшне үтәде.Узган гасырны галимнәр,язучылар һәм журналистлар төрлечә атадылар: атом гасыры, генетика гасыры, кибернитика гасыры һ.б. Иң еш кулланыла торган торган атама “Космик гасыры”булгандыр. Чыннан да,1957 нче елның 4 нче октябрендә Советлар Союзында Җирнең беренче ясалма иярчененең тиешле орбитага чыгарылуы күпләр өчен көтелмәгән вакыйга, могҗиза булды.Ясалма күк җисеме зур да, авыр да түгел иде: диаметры 580 мм, массасы 83,6 кг. Совет иленең космостагы көмешсыман ак шар рәвешендәге беренче “вәкиле” нең , 15 һәм 7,5 метрлы дулкында эшләгән ике радиотапшыргычы яңгыраган “бип-бип” дигән сигналлары космик эра башлануы турында игълан итте.