Җәмгыять алга барган саен, белем бирү системасында да үзгәрешләр арта бара. Бүгенге көн укытучысы һәр яклап тирән белемле һәм профессиональ компетенцияле, киң мәгълүматлы булганда гына, заманга лаеклы, иҗади һәм мөстәкыйль фикерләүче, югары зәвыклы шәхес тәрбияли ала.Креатив укытучы укыту-тәрбия процессын иҗади оештырырга ярдәм итүче инновацион технологияләр куллануны алгы планга куя. Шуларны күздә тотып, безнең мәктәптә критик фикерләү юнәлешен үстерү максатыннан Сингапур структураларын кулланып ачык дәресләр күрсәтү  атналыгы бара. Беренче булып үз дәресләрен башлангыч класс укытучылары тәкъдим итте. Гөлназ Илфатовна 3 класста татар теленнән “Исем” темасына ачык дәрес күрсәтте. Бу дәреснең төп максаты: исем сүз төркемен белергә, белемнәрне тирәнәйтергә, исемнәрне таный, таба, сораулар куя белергә иде. Гөлназ Илфатовна дәрестә җылы атмосфера тудырды, укучылар актив катнашты, балалар бер-берсенә карата ихтирамлы һәм игътибарлы булырга өйрәнделәр. Дәрес күзәткән укытучылар аңа югары бәя бирделәр.