Яз башында гына күзәтелә торган тагын бер рәхәт мизгел – ул күчмә кошларның кайтуы һәм матур итеп сайрап җырлаулары. Сыерчыклар күренү белән гөрләвекләр ага, үги ана яфраклары чәчәк ата, беренче күбәләкләр оча башлый. “Сыерчык диңгез артына китсә дә, туган оясына кайта”, — дигән сүз бар халыкта. Сыерчыклар - «яз хәбәрчеләре». Күчмә кошлардан язын алар беренче очып кайталар.Табигатьнең уянган мәле турында әйтүгә, сыерчык оясы кирәклеге искә төшә. Сыерчык оясы ясауны  ел саен гадәткә керткән гаиләләр дә бар мәктәбебездә. Районда булып узган "Иң матур сыерчык оясы" конкурсында укучыларыбыз теләп катнаштылар. Башлангыч сыйныф укучыларының әтиләре белән ясаган оялары иң матурлары булып чыкты. Шакирова Ильвина, Шакирова Ралинә  "Искиткеч сыерчык оясы" номинациясе җиңүчеләре булдылар. Гиниятуллина Нәзирә "Тамашачылар мәхәббәте " номинациясе җиңүчесе булды. Укучыларыбызны, аларның әтиләрен котлыйбыз, уңышлар теләп калабыз.

Сыерчык - кеше һәм табигать өчен файдалы кош. Яз килүгә сыерчыкларга оя ясыйк, аларның матур сайраулары белән шатланыйк.