6 нчы май көнне мәктәбебезгә сугыш чоры балаларын, тыл ветераннарын очрашуга чакырдык. Аларның язмышы сугыш уты белән үрелгән. Сугыш... Нинди шомлы һәм авыр сүз бу! Ул ничә миллион кешенең гомерен өзгән, күпме баланы ятим иткән, аналарны тол калдырган. Сугыш...Меңәрләгән шәһәрләрне җимергән, җир йөзендә гөрләп торган авылларны юкка чыгарган, шау чәчәккә күмелгән бакчалар янып көлгә әйләнгән. Бу тынычлыкны яулап алып биргән ветераннарга, сугыш чоры балаларына, тыл ветераннарына безнең рәхмәтебез чиксез.Аларның батыр хезмәтен һичкайчан онытмабыз, лаеклы алмаш булып үсәрбез.Ветераннарыбызны хөрмәтләп, "Ак Барс "Агрокомплекс" ширкәте  ярдәме белән чәй өстәле әзерләнде. "Ак Барс"Агрокомплекс" ширкәте җитәкчесе Салахов Ш.И. ветераннарыбызны Җиңү бәйрәме белән котлап, изге теләкләрен җиткерде. Сеҗе авыл җирлеге башлыгы Гыйбадуллина Г.М. шулай ук өлкәннәребезгә үзенең теләкләрен юллады.Укучыларыбыз көче белән концерт номерлары куелды. Өлкәннәребез сугыш чоры хатирәләре белән уртаклаштылар, үзләре дә гармун уйнап җырладылар. Очрашу бик җанлы үтте. Дөньяларыбыз имин, күкләребез  һәрчак аяз булсын иде.