Күңел Тукайга тора-тора кайта. Шагыйрь яшәгән еллардан ераклашкан саен, аның иҗатының бөеклеге, асыл мәгънәсе тагын да куәтлерәк һәм тирәнрәк ачыла бара. Чын шагыйрьләрнең гомере арифметик саннар белән генә бәяләнә алмый. Даһиларның гомере халык хәтере белән исәпләнә. Тукай бүген дә әдәбиятның алгы сафында баруын дәвам итә, бүген дә милли аң үсешенең юлбашчысы булып кала килә. Заман тудырган һәм милләтне борчыган бик күп сорауларга җавапны Тукай әсәрләреннән табарга мөмкин.Тукай… Тукайдан соң татар әдәбиятына бик күп шагыйрьләр килгәннәр, ләкин аларның берсе дә аның бөеклегенә күтәрелә алмаган, шуңа күрә халкыбызның горурлыгы булган Г.Тукайның тормыш юлын, иҗатын өйрәнү һәрвакыт актуаль булып кала.

     26 апрель көнне мәктәбебездә, Г.Тукай иҗатын өйрәнү максатыннан, "Шагыйрьләр солтаны" исемле КВН үтте. КВНда 6 һәм 7 сыйныф укучылары көч сынаштылар. Г.Тукай иҗатына кагылышлы сорауларга җавап бирделәр, мәкальләр әйтештеләр, әсәрләрен сәнгатьле итеп укыдылар, иллюстрацияләр ясадылар. КВНны татар теле һәм әдәбияты укытучысы Гыйбадуллина Гөлия Марсил кызы әзерләде һәм алып барды.