Башлангыч класс укучылары өчен бүген " Яхшылык дәресе" үткәрелде. Укучыларга тумыштан гарип булып, дөньяның рәхәтен күрми үскән балалар, һәлакәткә дучар булып, яшьнәп яшәр чакта урын өстенә, инвалид коляскасына беркетелгәннәр язмышы хакында видеороликлар күрсәтелде. Ләйлә Дәүләтованың «Халәт» шигыре өстендә фикер алышынды.

Берни ишетәсем килми,

Килми берни күрәсем.

Яшәү дәртем булмаса да,

Килми кебек үләсем.

Күңелемдә гел болытлар,

Соры да кара гына.

Ичмасам кояш та чыкмый

Болытлар арасына.

Әллә нинди халәт бит бу,

Әй, Ходаем, бир түзем.

Күпме халык арасында

Яшим кебек берүзем.

Алда яңа өметләр юк,

Юк буй җитмәс хыял да.

Бөркеткә дә нәкъ шулайдыр

Бәрелгәндә кыяга.

Бәхетсез мизгелләр кирәк

Бәхетне аңлар өчен.

Бер чирләп карау да җитә

Саулыкны саклар өчен.